2,5 kilometrli dor yo‘li, 150 metr balandlikdagi osma ko‘prik va hashamatli mehmonxona: Zomindagi turizm maskanidan reportaj

Jizzax viloyatining Zomin tumanida uzunligi 305, balandligi esa 150 metr bo‘lgan, Markaziy Osiyodagi yagona ko‘prik foydalanishga topshirildi. Bu haqda O‘zbekistonda faoliyat yurituvchi OAV vakillari, mustaqil jurnalist va blogerlar uchun tashkil etilgan press-tur davomida ma’lum qilindi. Mazkur press-turda ishtirok etgan “Daryo” ijodiy jamoasi Zomin tog‘idagi turizm maskani haqida reportaj tayyorladi. 

Mas’ullarning ma’lumot berishicha, Zomin tog‘idagi turizm maskani 950 gektar maydonga ega bo‘lib, hududda ko‘prik, salkam 2,5 kilometrlik dor yo‘li, uch yulduzli mehmonxona va sog‘lomlashtirish markazi joylashgan.

Zomin turistik-rekreatsion zonasi DUK direktori o‘rinbosari  Abdug‘ani Avazovning aytishicha, turizm maskani prezidentning 2021-yil 6-apreldagi “Zomin turistik-rekreatsion zonasini va xalqaro umummavsumiy kurortini tashkil etish chora-tadbirlari to‘g‘risida”gi farmoni ijrosi hisoblanadi.

Ushbu maskanning bosh rejasi turizmni rivojlantirishda yetakchi davlat bo‘lgan Avstriyaning loyiha kompaniyasi tomonidan ishlab chiqilgan bo‘lib, maskanda uchta uch yulduzli 600 o‘rinli mehmonxona, Shveysariya kompaniyasi texnologiyasi asosida barpo etilgan 36 ta kabinali osma dor yo‘li, 360 o‘rinli avtoturargoh, 100 o‘rinli sog‘lomlashtirish markazi, 140 o‘rinli restoran, 40 o‘rinli kafe va yoshar uchun Baxt uyi mavjud. Qolaversa, uzunligi 305, bo‘yi 150 metr bo‘lgan Markaziy Osiyodagi yagona ko‘prik ham bor, — deydi Zomin turistik-rekreatsion zona DUK direktori o‘rinbosari Abdug‘ani Avazov. 

Mas’ulning aniqlashtirishicha, 305 metr uzunlikka ega bo‘lgan ko‘prikka chiqish 12 yoshgacha bo‘lgan bolalar va 55 yoshdan yuqori qariyalar uchun bepul, qolganlar uchun esa 50 ming so‘mni tashkil etadi. 

Zomin turistik-rekreatsion zonasi DUK bosh mutaxassisi Kamol Farmonovning bildirishicha, ko‘prik bir vaqtning o‘zida 600 nafar kishini ko‘tara oladi. 

Ko‘prik Shveysariya texnologiyasi asosida qurilgan bo‘lib, birvarakayiga 600 nafar sayyohni ko‘tara oladi. Ko‘prik, 140 o‘rinli restoran, 40 o‘rinli kafe va Baxt uyi 84 milliard so‘m evaziga barpo etilgan, — deydi u. 

Press-tur davomida aniqlashtirishimizcha, hududdagi mehmonxonalarning standart xonalari ikki kishi uchun 2 million 200 ming so‘mni tashkil qiladi.

Bu narx ichida sayyohlarning uch mahal ovqatlanish xarajatlari ham kiritilgan. Shuningdek, lyuks xonalar esa 2 million 600 ming so‘m hisoblanadi.