Қонунчиликка кўра, 2025 йил 1 январдан бошлаб умумий овқатланиш корхоналарига фойда солиғи ставкаси 50 фоизга камайтирилади. Бу тартиб 2028 йил 1 январгача амалда бўлади.
Шунингдек, умумий овқатланиш хизматларини кўрсатувчи тадбиркорларга 2028 йил 1 январгача ҳар ойнинг 25 санасига қадар тўланган ҚҚСнинг бир қисмини қуйидаги миқдорларда республика бюджетидан қайтариш тизими жорий этилади.
Ойлик товар айланмасининг нақд пулсиз қисми:
- 60 фоиздан ошган умумий овқатланиш корхоналарига – бюджетга тўланган ҚҚСнинг 40 фоизи;
- 60 фоиздан кам умумий овқатланиш корхоналарига – бюджетга тўланган ҚҚСнинг 20 фоизи;
- туроператорлик ва меҳмонхона хизматларини кўрсатувчи тадбиркорларга – бюджетга тўланган ҚҚСнинг 20 фоизи.
Аввалроқ январь октябрь ойларида умумий овқатланиш фаолияти билан шуғулланувчи 19 514 та юридик шахс томонидан 1 трлн сўмдан ортиқ солиқ тўлангани маълум қилинганди. Шундан, 182,9 млрд сўми, яъни 16,8 фоизи 20 та корхона ҳисобига тўғри келади.
Уларнинг жами товар айланмаси 2,7 трлн сўмдан ошган, қўллаган солиқ имтиёзлари эса 56,4 млрд сўмни ташкил этган.
Изоҳ (0)