Rossiyada qisman safarbarlik e’lon qilingani va umuman murakkab geosiyosiy vaziyatga qaramasdan, Rossiyaga muhojirlar oqimi o‘zgarmagan. Bu haqda Migratsiya jarayonlarini tahliliy va amaliy tadqiq qilish markazi rahbari Vyacheslav Postavnin ma’lum qildi, deb yozadi “Izvestiya”.
Shu bilan birga, Rossiyada bo‘lib turgan chet el fuqarolari pasport olish jarayonini to‘xtatib qo‘ymoqda va vaqtinchalik yashab turish uchun ruxsatnoma yoki istiqomat guvohnomasi bilan cheklanmoqda.
“Avvalgidek, O‘zbekiston, Tojikiston, Qirg‘iziston fuqarolari Rossiyada ishlashga va yashashga intilmoqda. Ikkinchi navbatda esa bular Ozarbayjon, Armaniston fuqarolari. Shuningdek, ukrainaliklar, Moldova fuqarolari hambor. Umuman olganda, xuddi avvalgidek. Axir u yerda, ayniqsa, Tojikistonda va O‘zbekistonda ishlar ko‘payib qolgani yo‘q, yashash ham yaxshilanib qolgani yo‘q. Rossiyada esa bandlik ham, yuqori darajali maoshlar ham saqlanib qolmoqda”, — dedi u.
Uning fikricha, faqat Rossiyadagi qisman safarbarlik tufayli, fuqarolik olmoqchi bo‘lgan shaxslarning xatti-harakatlari o‘zgargan.
“Birinchi navbatda gap rahbariyati o‘z fuqarolariga Ukraina hududidagi jangovar harakatlarda qatnashishni taqiqlab, buning uchun jinoiy javobgarlik belgilagan mamlakatlar fuqarolari haqida bormoqda. Ayniqsa Tojikiston fuqarolari tarang holatda qoldi”, — dedi ekspert.
Hozir, uning so‘zlariga ko‘ra, shunday tendensiya kuzatilmoqdaki, chet elliklar vaqtinchalik yashash uchun ruxsatnoma yoki istiqomat guvohnomasi bilan cheklanib, pasport olish jarayonini to‘xtatib qo‘ymoqda.
“Bu hujjatlar bilan yashash mumkin, ishlash mumkin. Qisman safarbarlik ta’siriga tushmaydigan chet ellik ayollar, xuddi avvalgidek, Rossiya pasportlarini olishda davom etmoqda”, — dedi Postavnin.
Avvalroq rossiyalik jurnalist va teleboshlovchi Olga Romanova MDH mamlakatlari fuqarolari Rossiya tomonidan urushga jo‘natilayotganini ma’lum qilgandi.
Shuningdek, Markaziy Osiyo mamlakatlaridan kelgan muhojirlar ixtiyoriy harbiy xizmat haqida shartnomalar tuzishga majburlanayotgani haqida huquq himoyachisi Valentina Chupik ham aytib o‘tdi.
Eslatib o‘tamiz, 20-sentabr kuni Rossiya Davlat dumasi yangi qonun qabul qildi, unga muvofiq, armiyada bor-yo‘g‘i bir yil xizmat qilganlar ushbu mamlakat fuqaroligini qo‘lga kiritishi mumkin bo‘ladi.
Shundan keyin O‘zbekiston Bosh prokuraturasi xorijdagi o‘zbekistonliklarga murojaat qilib, ularni chet davlatlar harbiylashgan tuzilmalariga yollanish javobgarlikka sabab bo‘lishidan ogohlantirgandi. Shuningdek, O‘zbekistonning Rossiyadagi elchixonasi fuqarolarni harbiy harakatlarda ishtirok etmaslikka chaqirdi.
Shuningdek, Rossiyadagi harbiy xizmatga chet el fuqarolari, shu jumladan, Markaziy Osiyo davlatlaridan kelgan mehnat muhojirlari majburiy chaqirilishi haqidagi mish-mishlar rad etildi. Rossiyaning O‘zbekistondagi elchixonasi ma’lum qilishicha, internetda tarqalgan bunday xabarlar haqiqatga to‘g‘ri kelmaydi.
Izoh (0)