2024-yil 1-sentyabr holatiga ko‘ra, Rossiyada Markaziy Osiyo davlatlarining 3,985 million fuqarosi bor. Bu haqda “Kommersant” nashri Rossiya Ichki ishlar vazirligi ma’lumotiga tayanib xabar berdi.
Rossiyaga kelayotgan xorijliklar soni bo‘yicha O‘zbekiston yetakchi (1,792 million kishidan ortiq). Ikkinchi o‘rinda Tojikiston (1,231 milliondan ortiq), uchinchi o‘rinda Qozog‘iston (606,9 ming), keyingi o‘rinlarda esa Qirg‘iziston (262,8 ming) va Turkmaniston (92 ming kishi) turadi.
"Ayni paytda mamlakatimizda 6 million 174 ming nafar chet el fuqarolari bor. Rossiyadagi fuqarolar soni bo‘yicha birinchi o‘ntalikka O‘zbekiston, Tojikiston, Qirg‘iziston, Belarus, Ukraina, Armaniston, Ozarbayjon, Qozog‘iston, Xitoy va Turkmaniston kiradi. Jami olganda, mazkur davlatlarning 5,5 million fuqarosi Rossiyada bo‘lib turibdi”, dedi Ichki ishlar vazirligida migratsiya siyosatini nazorat qiluvchi vazirning birinchi o‘rinbosari, politsiya general-polkovnigi Aleksandr Gorovoy “Kommersant”ga bergan intervyusida.
2023-yilda Rossiya ombudsmani Tatyana Moskalkova ma’lumotlariga ko‘ra, MDHga a’zo davlatlardan 9 million 973 ming 338 nafar fuqaro Rossiyaga kirgan, ulardan 8 million 507 ming 906 nafari migratsiya ro‘yxatidan o‘tgan.
Gorovoyning ta'kidlashicha, mamlakatdagi xorijliklar soni har kuni Rossiya FSB Chegara xizmatidan Ichki ishlar vazirligiga kelib tushadigan ma'lumotlar asosida hisoblanadi.
2024-yil boshidan buyon Rossiyaga 7,5 millionga yaqin chet el fuqarolari kirgan, shuningdek, 6,8 millioni chiqib ketgan.
Izoh (0)