Rossiyada 2021-yilda ishlash uchun rasmiylashtirilgan jami patentlarning yarmidan ko‘pi O‘zbekiston fuqarolari hisobiga to‘g‘ri keladi. Bu haqda mamlakat IIVning migratsiya holati bo‘yicha ko‘rsatkichlarida qayd etilgan, deb xabar beradi “TASS”.
Idora ma’lumotlariga ko‘ra, 2021-yilning yanvar—dekabr oylarida ishlash uchun 2 221 816 ta patent rasmiylashtirilgan bo‘lib, ularning 1 316 569 tasi O‘zbekiston fuqarolariga tegishli. Shuningdek, Tojikiston fuqarolari — salkam 787 mingta, Ozarbayjon fuqarolari esa 65 mingga yaqin patent olgan. Bundan tashqari, Ukraina (37 ming) va Moldova (17 ming) fuqarolariga ham patentlar rasmiylashtirilgan.
2021-yilda Rossiyada migrantlarning ishlashi uchun rasmiylashtiriladigan patentlar soni qariyb ikki barobarga oshgan. Shuningdek, o‘tgan yili chet el fuqarolariga ishlash uchun berilgan ruxsatnomalar soni ham oshgan. 2021-yilda Rossiya IIVga mamlakat hududida mehnat faoliyatini olib borayotgan xorijlik fuqarolar bilan tuzilgan mehnat shartnomalari to‘g‘risida 1 673 342 ta xabarnoma kelib tushgan.
Avvalroq Moskva hukumati qurilishlarda migrantlardan butunlay voz kechishni ta’minlaydigan rejani tayyorlashi, O‘zbekiston fuqarolari Rossiyaga kirgan kundan boshlab 15 kun ichida ro‘yxatdan o‘tish zaruratidan ozod etilishi mumkinligi, Rossiya hukumati 150 ming o‘zbekistonlik muhojirning mamlakatga kirishiga qo‘yilgan taqiqni olib tashlagani to‘g‘risida xabar berilgandi.
Izoh (0)