2024-yilda dengiz orqali Ispaniyaga yetib olishga uringan 10 mingdan ortiq migrant halok bo‘ldi. Bu haqda turli migratsiya yo‘nalishlarini tahlil qiluvchi Caminando Fronteras tashkiloti hisobotida aytiladi.
Tashkilotga ko‘ra, bu yil har kuni o‘rtacha 30 nafar migrant Ispaniyaga qayiqda yetib borishga urinib halok bo‘lgan. O‘lganlarning umumiy soni o‘tgan yilga nisbatan 58 foizga ko‘p.
Halok bo‘lganlar orasida 1538 nafar bola va 421 nafar ayol bor. Eng halokatli oylar aprel va may oyiga to‘g‘ri keladi.
Ispaniya ichki ishlar vazirligi maʼlumotlariga ko‘ra, joriy yilning 15-dekabriga qadar 57,7 mingdan ortiq migrant Ispaniyaga qayiqda yetib kelgan. Bu o‘tgan yilning shu davriga nisbatan 12 foizga ko‘p.
Avvalroq Ispaniya hukumati aholining qarishi sababli mamlakatdagi ishchi kuchi tanqisligini to‘ldirish uchun yiliga 300 minggacha migrantni legallashtirish niyatida ekani xabar qilingandi.
“Ispaniyada ochiq, gullab-yashnagan mamlakatga aylanish yoki yopiq, qashshoq mamlakat bo‘lib qolish o‘rtasida tanlov bor. Biz birinchisini tanladik”, degan Ispaniya ijtimoiy taʼminot va migratsiya vaziri Elma Sais.
Izoh (0)