2024 йилда денгиз орқали Испанияга етиб олишга уринган 10 мингдан ортиқ мигрант ҳалок бўлди. Бу ҳақда турли миграция йўналишларини таҳлил қилувчи Caminando Fronteras ташкилоти ҳисоботида айтилади.
Ташкилотга кўра, бу йил ҳар куни ўртача 30 нафар мигрант Испанияга қайиқда етиб боришга уриниб ҳалок бўлган. Ўлганларнинг умумий сони ўтган йилга нисбатан 58 фоизга кўп.
Ҳалок бўлганлар орасида 1538 нафар бола ва 421 нафар аёл бор. Энг ҳалокатли ойлар апрель ва май ойига тўғри келади.
Испания ички ишлар вазирлиги маълумотларига кўра, жорий йилнинг 15 декабрига қадар 57,7 мингдан ортиқ мигрант Испанияга қайиқда етиб келган. Бу ўтган йилнинг шу даврига нисбатан 12 фоизга кўп.
Аввалроқ Испания ҳукумати аҳолининг қариши сабабли мамлакатдаги ишчи кучи танқислигини тўлдириш учун йилига 300 минггача мигрантни легаллаштириш ниятида экани хабар қилинганди.
“Испанияда очиқ, гуллаб-яшнаган мамлакатга айланиш ёки ёпиқ, қашшоқ мамлакат бўлиб қолиш ўртасида танлов бор. Биз биринчисини танладик”, деган Испания ижтимоий таъминот ва миграция вазири Элма Саис.
Изоҳ (0)