Ispaniya hukumati aholining qarishi sababli mamlakatdagi ishchi kuchi tanqisligini to‘ldirish uchun yiliga 300 minggacha migrantni qonuniylashtirish niyatida. Bu haqda mamlakat ijtimoiy ta’minot va migratsiya vaziri Elma Sais Economic Times nashriga ma’lum qildi.
“Ispaniyada ochiq, gullab-yashnagan mamlakatga aylanish yoki yopiq, qashshoq mamlakat bo‘lib qolish o'rtasida tanlov bor. Biz birinchisini tanladik”, dedi u.
Vazirning so‘zlariga ko‘ra, migrantlar bilan bog‘liq siyosat uch yil davom etadi. Uning aniqlik kiritishicha, Ispaniya farovonlikni saqlab qolish uchun yiliga soliq to‘lay oladigan 250-300 ming xorijiy ishchiga muhtoj.
Maʼlumotlarga ko‘ra, hokimiyat tomonidan yangi chora-tadbirlar migrantlarga yashash va ishlash uchun ruxsatnomalar berish tartib-taomillarini soddalashtirishni nazarda tutadi, bu esa chet ellik ishchi kuchiga kafolatlangan mehnat huquqlarini olishga yordam beradi. Bundan tashqari, ish izlayotgan tashrif buyuruvchilar vizasini 3 oydan 12 oygacha uzaytirishi mumkin. O‘qish vizasiga ega xorijliklarga haftasiga 30 soatgacha ishlashga ruxsat beriladi.
OAVning qayd etishicha, 48,9 million aholiga ega Ispaniya iqtisodiyoti Yevropa ittifoqida eng tez o‘sayotgan mamlakat hisoblanadi. Bu tendensiyaga Lotin Amerikasi davlatlaridan malakali migrantlar oqimi ham yordam bermoqda. Fitch Ratings Inc agentligining hisob-kitoblariga ko‘ra, 2022-yilda Ispaniyaga oldingi o‘n yillikdagidan ko‘ra ko‘proq migrant kelgan.
Avvalroq Yevropa ittifoqiga yetib olishga urinayotgan taxminan 200 nafar noqonuniy migrantni olib ketayotgan kema Senegal qirg‘oqlarida ag‘darilib ketgani xabar qilingandi.
Shu yilning sentyabr oyida Italiyaning Lampeduza oroli yaqinida qayiq ag‘darilib ketishi oqibatida 21 nafar migrant bedarak yo‘qolgan.
2024-yilning yetti yarim oyida G‘arbiy Afrika davlatlaridan Kanar orollariga 22 mingdan ortiq noqonuniy migrant kelgan bo‘lsa, 2023-yilning shu davrida bu ko‘rsatkich 9,8 ming nafarni tashkil etgan.
Izoh (0)