AQSh rasmiylari Gruziyaning amaldorlariga qarshi sanksiyalar joriy qildi.
Qayd etilishicha, ro‘yxatga Gruziya Ichki ishlar vazirligi rahbari Vaxtang Gomelaurining nomi kiritilgan bo‘lib, u “tinch namoyishlarni bostirish”da ishtirok etgani uchun cheklovlarga duchor bo‘lgan.
Bundan tashqari, cheklovlar ichki ishlar vaziri o‘rinbosari Aleksandr Daraxvelidze, Tbilisi politsiya boshqarmasi boshlig‘i Sulxan Tamazashvili, Ichki ishlar vazirligining maxsus topshiriqlar boshqarmasi boshlig‘i, Gruziya maxsus kuchlari rahbari Zviad Xarazishvili va uning o‘rinbosari Mileri Lagazauriga ham tegishli.
Avvalroq Buyuk Britaniya ham Gruziya ichki ishlar vaziri va mamlakatdagi bir qancha amaldorlarga qarshi sanksiyalar joriy qilgan edi.
18-dekabr kuni AQSH prezidenti Jo Bayden boshchiligidagi AQShning amaldagi maʼmuriyati o‘z muddati tugagunga qadar Gruziya rasmiylariga qarshi qo‘shimcha sanksiyalar joriy etish niyatida ekanligini maʼlum qilgan edi.
Gruziya poytaxti Tbilisida 28-noyabr kuni tunda norozilish namoyishlari avj oldi, unda mamlakat prezidenti Salome Zurabishvili ham ishtirok etdi.
Tbilisidagi namoyish bosh vazir Irakliy Koboxidze hukmron “Gruzin orzusi — demokratik Gruziya” partiyasi 2028-yil oxirigacha Yevropa ittifoqiga a’zo bo‘lish bo‘yicha muzokaralarni muhokama qilmasligi va hamjamiyatning barcha byudjet grantlaridan voz kechish qaroridan so‘ng boshlangan.
14-dekabr kuni “Gruziya orzusi” partiyasidan nomzod Mixail Kavelashvili Gruziya prezidenti etib saylandi. Markaziy saylov komissiyasi ma’lumotlariga ko‘ra, u saylovchilar hay’ati a’zolarining 224 ovozini qo‘lga kiritdi. Kavelashvili prezidentlik lavozimiga yagona nomzod bo‘lgan.
Izoh (0)