Toshkent viloyatining Parkent tumanida xalqaro uzum sayli bo‘lib o‘tdi (fotoreportaj)

Toshkent viloyatining Parkent tumanidagi Zarkent qishlog‘ida xalqaro uzum sayli bo‘lib o‘tdi. Bu haqda “Daryo”ga viloyat hokimligi axborot xizmati xabar berdi. 

Ta’kidlanishicha, mazkur festival ikki kun davom etdi. 

Festivalni o‘tkazishdan ko‘zlangan asosiy maqsad, nafaqat yurtimiz, balki, xorijga birgina viloyatimiz misolida turizm salohiyatini keng namoyish etish, milliy mahsulotimiz brendini jahon bozorida munosib o‘ringa ega bo‘lishini ta’minlash, qadimiy uzumchilik va vinochilik tajribasi hamda bog‘dorchilik mahsulotlarining noyob tur va navlarini keng ommalashtirish, – deydi Toshkent viloyati hokimligi axborot xizmati rahbari Behzod Qobulov.

Ta’kidlanishicha, mazkur festivalda Koreya, Singapur, Belarus, Gruziya, Ozarbayjon kabi 30 dan ortiq davlatlarning vinochilik sohasida yirik va yetakchi kompaniya vakillari ham ishtirok etgan. 

Festivalda aytilishicha, Parkent uzumchilik tarixi bevosita shu yerlik Tojivoy Rizayev nomi bilan bog‘liq. 

Daromad keltirmaydigan, suvsiz noqulay deb hisoblangan yer maydonlariga uzum ko‘chatlari ekilib, o‘tgan yillarda to‘plangan tajriba va kuzatishlar asosida yaratilgan agrotexnik qoidalarga tayanib parvarish qilindi. Bu esa o‘z samarasini berdi. 1980-yillarga kelib 200 gektar uzumzor mo‘l hosil olina boshladi. Suvsiz yerda yetishtirilgan uzum hosilidan yaxshigina daromad qilgan bog‘bonlar endi hech ikkilanmasdan yangi uzumzorlar barpo etishga kirishdi, — deydi festival tashkilotchilar.

Festival doirasida shuningdek, O‘zbekiston qahramoni Tojivoy Rizayevning porloq xotirasiga bag‘ishlangan hujjatli film premyerasi bo‘lib o‘tdi. 

Festivalda biznes taqdimotlari va muzokaralar o‘tkazilib, shartnomalar, bitimlar imzolash uchun barcha sharoitlar yaratildi. 

Festival yakunida eng yaxshi ishtirokchilar bir qator nominatsiyalar va pul mukofotlari bilan taqdirlandi. “Eng namunali stend” Gran-pri, 50 million so‘m miqdoridagi pul mukofoti Jizzax viloyatiga nasib etdi. 
“Noyob uzum navlari to‘g‘risidagi ilmiy yondashuvi uchun”, “Uzumchilik an’analarini faol targ‘boti uchun” kabi 10 dan ortiq nominatsiyalar hamda  eng sifatli vino mahsuloti ishlab chiqargan, vinochilikda innovatsion texnologiyalarni o‘zlashtirgan bir qator korxonalar,  munosib taqdirlandi. Ularga qimmatbaho sovg‘a va pul mukofotlari topshirildi.