Checheniston rahbari Ramzan Qodirov Rossiya prezidenti Vladimir Putin hokimiyat vertikalining asosiy yetakchilarini qattiq tanqid qildi va rasmiylarni Ukraina hamda Gruziya bilan munosabatlarning buzilishida aybladi.
2012-yildan beri Ichki ishlar vazirligini boshqarib kelayotgan Vladimir Kolokoltsev va 2011-yildan buyon Tergov qo‘mitasini boshqarib kelayotgan Aleksandr Bastrikin “o‘z joylarida o‘tirishmayapti”, dedi Qodirov.
Uning so‘zlariga ko‘ra, Ichki ishlar vazirligi va Tergov qo‘mitasidagi “yuqorida o‘tirganlar” prezident tomonidan qo‘yilgan vazifalarni “sifatli” bajarmayapti.
Qodirovni tanqid qilishiga Crocus’dagi teraktdan so‘ng boshlangan va rasmiy ma’lumotlarga ko‘ra, sobiq SSSR davlatlaridan 2 millionga yaqin odamning Rossiyadan chiqib ketishiga olib kelgan muhojirlarga nisbatan siyosatning keskinlashgani sabab bo‘ldi.
“Kolokoltsev buyruq berdi: endi yangi kelganlarni kaltaklashmoqda, olib ketishmoqda, haydab chiqarishmoqda — ular biz uchun kerakli birodarlarimiz. Keyin hech kim biz bilan do‘st bo‘lishni xohlamaydi, deyishadi. Nega biz Ukrainani, Gruziyani yo‘qotdik? Nega boshqa davlatlar bilan munosabatlar keskinlashgan? Chunki odamlar davlatda nima bo‘layotganini bilmaydi. Ular hududlarga chiqmaydi, odamlar bilan muloqot qilmaydi. Ular qonunsiz, kreslolarda o‘tirib, derazadan tashqarida nima bo‘layotganiga qaramaydi”, deya qo‘shimcha qilgan Checheniston yetakchisi.
Qodirov Rossiya Tergov qo‘mitasining Moskvadagi Bosh tergov boshqarmasi unga nisbatan to‘rt modda bo‘yicha jinoiy ish qo‘zg‘atgan Muslim Murdiev ishini izohlar ekan, “Alloh ularni albatta jazolashi”ga ishonch bildirdi.
Chechenistonlik o‘smir bir guruh shaxslar bilan til biriktirib, fuqarolarga nisbatan zo‘ravonlik qo‘llash orqali jamoat tartibini qo‘pol ravishda buzganlikda ayblanmoqda. U yetti oydan beri hibsda saqlangan va avvalroq Qodirovga yordam so‘rab murojaat qilgan.
Ayblanuvchining so‘zlariga ko‘ra, u faqat o‘z o‘rtog‘ini himoya qilgan, unga o‘zidan ancha kuchliroq jang qo‘zg‘atuvchisi hujum qilgan.
Bir kun avval Checheniston rahbari respublika fuqarolari bilan “To‘g‘ridan-to‘g‘ri liniya” o‘tkazdi. Checheniston rahbari o‘zi bilan 12 nafar ukrainalik harbiy asirni olib kelgan, ular bilan kameralar ostida suhbatlashgan. Qodirov ukrainalik jangchilardan biriga to‘pponcha olib, o‘zini otib tashlashni taklif qildi.
Izoh (0)