20-iyun kuni kechqurun Gruziya poytaxti Tbilisida “Yevropaga qaytish” nomi ostida yevrointegratsiyaga bag‘ishlangan miting bo‘lib o‘tdi, deb xabar bermoqda Meduza.
Ba’zi ma’lumotlarga qaraganda, unda 30 mingdan 50 ming nafargacha odam qatnashgan. Miting “Uyat” fuqarolar harakati tomonidan tashkillashtirilgan, uning ishtirokchilarini Gruziya prezidenti Salome Zurabishvili olqishlagan.
Gruziyaning yevrointegratsiyalashuviga bag‘ishlangan aksiyalar mamlakatning boshqa bir qancha shaharlarida va Yevroittifoq mamlakatlari poytaxtlarida ham bo‘lib o‘tdi.
Bunday aksiyalar Yevroittifoqning 23—24-iyun kunlari bo‘lib o‘tadigan sammitiga qaratilgan bo‘lib, unda Gruziya, Ukraina va Moldovaga Yevroittifoqqa a’zolik nomzodi maqomini berish masalasi ko‘rib chiqiladi. O‘tgan hafta Yevrokomissiya Gruziyaga emas, ammo Ukraina va Moldovaga shunday maqom taqdim etishni tavsiya qilgandi.
“Kommersant” yozishicha, miting, shu jumladan, 2019-yil 20-iyundagi voqealarga ham bag‘ishlangan. O‘shanda parlament binosi yaqinida haqiqiy qonli olishuv bo‘lgan edi. Pravoslavlar parlamentlararo assambleyasi prezidenti, KPRFdan Davlat dumasi deputati Sergey Gavrilov Gruziya oliy qonunchilik organi raisi kursisiga o‘tirganidan keyin Mixail Saakashvili tarafdorlari parlament binosiga bostirib kirishga uringandi. IIV maxsus topshiriqli bo‘linmalari bilan to‘qnashuvlar bo‘lib o‘tgan, bir necha kishi rezina o‘qlar tegishi oqibatida ko‘zlaridan ayrilgan, yuzlab faollar politsiya tomonidan hibsga olingan edi.
O‘sha voqealarni esda tutgan holda, joriy miting tashkilotchilari aksiya siyosiy tusga ega emas, deb e’lon qildi. Siyosiy shiorlar yoki sobiq prezident Mixail Saakashvilini ozod etish talablari yangramadi.
“Interfaks” xabariga ko‘ra, aksiya ko‘ngilsiz voqealarsiz yakunlangan. Uning ishtirokchilari aytishicha, ushbu marsh Gruziya Yevropaning ajralmas qismi ekanini namoyish etadi. Aksiya yakunida tashkilotchilar manifest taqdim etdi va 24-iyun kuni yana bir miting o‘tkazilishini e’lon qildi.
Izoh (0)