Yevro—2024 musobaqasining 1-tur uchrashuvlari o‘z yakuniga yetdi. Ushbu tur bir nechta kutilmagan natijalar va jarohatlar bilan yodda qoldi.
Belgiyaning kutilmagan mag‘lubiyati va Lukakuning bekor qilingan ikki goli
Belgiya terma jamoasi hujumchisi Romelu Lukaku uchun Yevro—2024 musobaqasining boshlanishi JCh—2022 turnirining davomidek tuyuldi.
Belgiyaliklar sensatsion tarzda Slovakiyaga 0:1 hisobida mag‘lub bo‘ldi va milliy jamoaning markaziy hujumchisi Lukakuning raqib darvozasida hech ham omadi kelmadi.
Lukaku Yevropa chempionatlari tarixidagi bir o‘yinda ikkita goli bekor bo‘lgan ilk futbolchiga aylandi.
Avvaliga Romelu tomonidan kiritilgan gol hujumchining ofsaydda qolgani, keyingi goli esa golli uzatma bergan Lua Opendaning qo‘li to‘pga teggani sabab bekor qilindi. Belgiyalik murabbiy Domeniko Tedesko Belgiya terma jamoasi bilan birinchi marta mag‘lubiyatga uchradi.
Ruminiya jamoasining Ukraina ustidan yirik hisobdagi g‘alabasi
Ukraina termasi Ruminiya bilan o‘yinda favorit hisoblanayotgan edi, ammo 0:3 hisobida sensatsion hisobda mag‘lubiyatga uchradi. “Real Madrid” darvozaboni Andrey Lunin o‘zining eng yomon o‘yinlaridan birini o‘tkazdi, ayniqsa ikkinchi golda darvozabon ishonchsiz o‘ynadi.
Tarkibida yulduz futbolchilari yo‘q ruminlar kuchli futbol namoyish etdi. Aleksandr Zinchenko o‘yindan so‘ng o‘z fikrini bildirib o‘tdi.
Men nima deyishni bilmayman. Muxlislar ko‘ziga qarash juda uyatli... Birinchi o‘yin juda muhim ekanini barcha tushundi, lekin afsuski, ushbu mag‘lubiyat sodir bo‘ldi.
Birinchi turning eng chiroyli o‘yini va “Real Madrid” iqtidorining muhim goli
Turkiya va Gruziya terma jamoalari, ko‘pchilikning fikriga ko‘ra, Yevro—2024 turniri 1-turining eng tomoshabop o‘yinini o‘tkazdi. Italiyalik Vinchenso Montella va fransiyalik Villi Sanol jamoalari to‘rtta gol urdi.
Turklar uchun muhim ikkinchi golni “Real Madrid”ning yosh iste’dodi Arda Gyuler kiritdi. Hujumkor yarim himoyachi jarima maydonchasi tashqarisidan yuqori burchakka ajoyib aylanma zarba berdi. Darvozabon Mamardashvili bu vaziyatda ojiz qoldi. So‘nggi daqiqalarda butun jamoa bilan hujumga o‘tgan Gruziya qo‘shib berilgan daqiqalarda jazolandi. Yakuniy hisob — 3:1.
Germaniya termasining ochilish o‘yinidagi yirik hisobdagi g‘alabasi
Yevro—2024 ning birinchi o‘yini bir nechta rekordlarni taqdim etdi. Birinchidan, ochilish uchrashuvi bunchalik yirik hisob bilan yakunlanmagan edi. Ushbu o‘yinda nemislar shotlandlar ustidan yirik hisobda g‘alaba qozondi — 5:1. Bundan tashqari, Germaniya terma jamoasini boshqarayotgan Yulian Nagelsmann Yevropa chempionatlari tarixidagi eng yosh murabbiyga aylandi. O‘yin kuni u 36 yosh-u 327 kunlik edi.
Dastlabki ikki golni Florian Virts va Jamol Musiala kiritdi. Va ular yana bir natijani qayd etdi — Yevro tarixida birinchi marta 22 yoshgacha bo‘lgan ikki futbolchi bir o‘yinda gol mualliflariga aylandi.
Portugaliyaning qiyin g‘alabasi, Ronaldudan to‘liq o‘yin
Krishtianu Ronaldu va uning jamoasi 2016-yilgi natijani takrorlash uchun birinchi qadamni qo‘ydi. Portugaliya terma jamoasi Yevropa chempionatini chexlar ustidan qozonilgan irodali g‘alaba bilan boshladi. Katta ustunlikka ega bo‘lgan portugallar bir soatlik o‘yindan so‘ng gol o‘tkazib yubordi. Robin Granachning avtogoli evaziga hisob tenglashdi. Biroz o‘tib Portugaliya yana gol urdi. Ronaldu ofsaydda qolgani sabab bu gol bekor qilindi.
Chexiya terma jamoasi qo‘shib berilgan daqiqalargacha durang natijani ushlab qolishga harakat qildi. Biroq Chiko Konseysao bunga rozi bo‘lmadi va qo‘shib berilgan daqiqalarning ikkinchisida g‘alaba to‘pini kiritdi.
Bu o‘yinda Ronaldu o‘zining 6-musobaqasini o‘tkazdi, Pepe esa musobaqada ishtirok etayotgan eng keksa futbolchiga aylandi.
Fransiya terma jamoasi yulduzi Kilian Mbappening burni sindi
Fransiya terma jamoasi Yevropa chempionatini Avstriya ustidan qozonilgan g‘alaba bilan boshladi – 1:0. Avstriyaliklar mag‘lubiyatiga sabab bo‘lgan yagona golni o‘zlari kiritdi. “Real” klubining yangi futbolchisi Mbappe burnini sindirib oldi.
Hujumchi avstriyalik himoyachi Kevin Danso bilan to‘qnashuvda jarohat oldi. Mbappe uchun singan burnini himoya qiladigan niqob tayyorlanadi.
Tekshiruv natijalariga ko‘ra, Kilian jarrohlik amaliyotini o‘tkazmaslikka qaror qilgan, ammo u guruh bosqichining 2 va 3-turlarini o‘tkazib yuboradi.
Eng zerikarli o‘yin namoyish etgan Angliya jamoasidan zarbalar bo‘yicha antirekord
Yevro—2024 musobaqasining 1-turida Angliya termasi tarkibda eng yaxshi futbol yulduzlarini to‘planganiga qaramay, Garet Sautgeyt boshchiligidagi jamoa birinchi turdagi eng zerikarli o‘yinni ko‘rsatdi. Serblar darvozasiga gol urgan inglizlar hisobni saqlab qolish uchun o‘ynay boshladi va o‘z maqsadiga erishdi.
Ammo bunday o‘yinda o‘tgan mavsumda Premyer Liganing eng yaxshi o‘yinchisi Fil Foden va Germaniya chempionati yetakchi o‘yinchilaridan biri Harri Keyn ham tanaffusga qadar to‘pga bor-yo‘g‘i ikki marta to‘pga tegindi. Shu ma’lumot ham futbol vatani — Angliya termasining naqadar himoyaviy va zerikarli o‘yin ko‘rsatganining yaqqol isboti hisoblanadi.
Opta Sport statistik sayti ma’lumotlariga ko‘ra, Serbiya va Angliya terma jamoalari o‘rtasidagi o‘yinda darvoza tomon 11 ta zarba berdi. Ushbu natija 1980-yildan beri Yevropa chempionatidagi eng yomon natija sanaladi.
- Yevropa chempionatining ikkinchi tur uchrashuvlariga bugun, 19-iyun sanasidan start beriladi va jamoalarda keyingi bosqich masalasini hal qilish imkoni mavjud.
Izoh (0)