Tbilisi markaziga o‘n minglab namoyishchilar to‘plandi. Ular Mixail Saakashvili ozod etilishini talab qildi (fotoreportaj)

14-oktabr kuni kechqurun Tbilisi markazidagi Ozodlik maydonida 20-30 ming odam to‘plandi, u yerda Gruziyaning uchinchi prezidenti Mixail Saakashvilini qamoqdan ozod qilish talabi bilan namoyish bo‘lib o‘tdi. Saakashvili 1-oktabr kuni Ukrainadan vataniga qaytgach, hibsga olingandi. Sobiq prezident Gruziya poytaxti yaqinidagi Rustavi qamoqxonasida. U ochlik e’lon qilganiga o‘n kundan oshdi.

Gruziyada 2003-yilgi “atirgul inqilobi” ham shu maydonda boshlangandi. Muxolifat hozirgi miting 30-oktabrga belgilangan munitsipal saylovlarning ikkinchi bosqichi oldidan muhim voqea bo‘lishiga umid bildirdi.

Tbilisi, Rustavi, Batumi, Poti, Kutaisi va Zugdidi kabi bir qancha muhim shaharlarda mer lavozimiga saylovlarning birinchi bosqichida Saakashvilining “Yagona milliy harakat” (YMH) partiyasidan nomzodlar ikkinchi bosqichga yo‘l oldi va hukmron “Gruziya orzusi” partiyasidan bo‘lgan nomzodlarni mag‘lub etish uchun haqiqiy imkoniyatni saqlab qoldi.

Mitingning asosiy talabi —mansabini suiiste’mol qilgani uchun avvalroq Tbilisi sudi tomonidan olti yilga ozodlikdan mahrum etilgan Mixail Saakashvilini ozod qilish. Miting boshlanishidan oldin sobiq prezident o‘z tarafdorlariga maktub bilan murojaat qildi. Saakashvilining advokati Nika Gvaramiya maktubni shahar kengashi binosi oldidagi sahnada o‘qib eshittirdi.

Siyosatchi o‘z murojaatida mamlakat xalqini “yovuzlik va yolg‘on karfageni” bo‘lgan hozirgi hukumatga qarshi kurashish uchun birlashishga chaqirdi. “Hammamiz birlashishimiz kerak — mamlakatdagilar, chet eldagilar ham, qamoqdagi va ozodlikdagilar ham. Hozir partiya yoki boshqa prinsip bo‘yicha bo‘linish vaqti emas. Gruziyani qutqarish vaqti keldi va bugun buning uchun eng muhimi — birlik ”, — deb yozadi Saakashvili.

“Agar tirik holimda o‘z mamlakatimga yordam bera olmasam, ehtimol mening o‘limim uning yo‘lini yoritib beradi”, — deyiladi Saakashvilining maktubida.

Mitingga tayyorgarlik payshanba kuni ertalabdan boshlandi: mamlakatning barcha viloyatlaridan YMH tarafdorlari mingan avtomobillar karvoni poytaxt tomon yo‘l oldi. Yo‘lda ularni Mixail Saakashvilining muxoliflari kutib oldi. Ular mashinalarga qo‘pol so‘zlar va la’natlar yog‘dirishdi, shuningdek, prezident Saakashvili davrida Gruziya qamoqxonalaridagi “qiynoq amaliyotini” eslab, ularga supurgi uloqtirishdi.

Muxolifatchilarning Tbilisi tomon yurishi bilan bir vaqtda Gruziya Ichki ishlar vazirligining maxsus kuchlari ma’muriy binolarni, shu jumladan, davlat kanselariyasi (bosh vazir Irakli Garibashvilining idorasi joylashgan) va parlament binosini o‘rab oldi.

Biroq YMH yetakchilaridan biri — Kutaisi meri uchun nomzod, ilgari Ukraina Milliy politsiyasi boshlig‘i lavozimida ishlagan Xatiya Dekanoidze oldindan jurnalistlarga miting nihoyatda tinch bo‘lishini aytdi. Uning so‘zlariga ko‘ra, muxolifat ma’muriy binolarga bostirib kirishni rejalashtirmagan.

Miting tinch o‘tdi, shu sabab politsiya hech qanday tarzda voqealar rivojiga aralashmadi. Mitingni olib borayotgan sobiq adliya vaziri Nika Gvaramiyaning aytishicha, muxolifat harakatining asosiy maqsadi “Gruziyani Rossiya imperiyasi kishanidan ozod qilish va Putinning shaxsiy asiri — buyuk prezident Mixail Saakashvilini hibsdan chiqarish”.

Eslatib o‘tamiz, gruzin muxolifati “Gruziya orzusi” asoschisi Bidzina Ivanishvilining Rossiya Federatsiyasi bilan chambarchas bog‘liqligini muntazam aytib keladi.