Gruziya sobiq prezidenti Mixail Saakashvilini qo‘llab-quvvatlash maqsadida mamlakatda o‘tkazilayotgan norozilik namoyishi ishtirokchilari davlat muassasalari binolarini bloklashni rejalashtirmoqda. Davlat to‘ntarishini Gruziyaning qamoqda saqlanayotgan sobiq yetachisi boshqarmoqda. Bu haqda mamlakat Davlat xavfsizlik xizmati vakili Bacha Mgeladzega tayanib, “TASS” xabar berdi.
“2021-yilning 6-noyabridan boshlab Rustavidagi 12-sonli jazoni ijro etish muassasasi yaqinida ayrim siyosiy guruhlar tomonidan norozilik namoyishlarini o‘tkazmoqda, bu yerga viloyatlardan partiyalarning tarafdorlari keladi. Bundan tashqari, norozilik namoyishini Tbilisi shahrida ham o‘tkazish rejalashtirilgan. Tezkor ma’lumotlarga ko‘ra, namoyish tashkilotchilari davlat muassasalarini bloklashni reja qilyapti. Maqsadi zo‘ravonlik bilan hokimiyatni ag‘darish bo‘lgan ushbu harakatlar qamoqda saqlanayotgan Mixail Saakashvili tomonidan rejalashtirilyapti”, — deydi Mgeladze.
Mgeladzening so‘zlariga ko‘ra, namoyishchilar parlament, hukumat administratsiyasi, prezident administratsiyasi, Adliya vazirligi, IIV binolarini qurshab olishni, shuningdek, Saakashvili saqlanayotgan Rustavidagi qamoqxonaga eltuvchi yo‘lni yopib qo‘yish niyatida. Qayd etilishicha, namoyishchilarga kuch tuzilmalarining sobiq xodimlari kelib qo‘lishi, tashkilotchilar esa o‘z tarafida ko‘proq amaldagi kuch tuzimalari vakillarini jalb etishni reja qilmoqda.
Eslatib o‘tamiz, 1-oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. Hozir u Rustavi shahridagi qamoqxonada, u yerda o‘zini siyosiy mahbus deb hisoblagani uchun ochlik e’lon qilgan.
Gruziya Adliya vazirligi sobiq prezidentni qamoqxona kasalxonasiga yotqizishni bir necha bor taklif qilgan, biroq Saakashvili va uning advokatlari bunga mutlaqo qarshi. Ular Gruziyaning sobiq rahbarini xususiy fuqarolik klinikasiga olib borishni talab qilmoqda.
Izoh (0)