Prezidentning “O‘zbekiston Respublikasi Prezidentining ayrim hujjatlariga o‘zgartirish va qo‘shimchalar kiritish to‘g‘risida”gi farmoni qabul qilindi. Bu haqda Adliya vazirligi xabar berdi.
Farmonga ko‘ra, Prezidentining ayrim hujjatlariga quyidagilarni nazarda tutuvchi o‘zgartirish va qo‘shimchalar kiritildi:
- moliya-xo‘jalik faoliyatini amalga oshirmayotgan tadbirkorlarni belgilash mezonlarini takomillashtirish;
- yangidan tashkil qilingan tadbirkorlarning rivojlanishini baholash ko‘rsatkichlarini maqbullashtirish;
- “BBB” toifadagi tadbirkorlarga tovarlarni import qilishda va tovarlarni (xizmatlarni) realizatsiya qilishda to‘lanadigan QQS summalarini o‘zaro hisobga olish tartibini tatbiq etish;
- mahalliy pivo mahsulotlarini realizatsiya qilish faoliyatini vakolatli organni xabardor qilish tartibida amalga oshirish.
Bunda Prezident farmoniga kiritilgan qo‘shimchaga ko‘ra, moliya-xo‘jalik faoliyatini amalga oshirmayotgan korxonalarni tugatishda:
- moliya-xo‘jalik faoliyatini amalga oshirmayotgan korxonalar davlat soliq xizmati organining taqdimnomasiga asosan ro‘yxatdan o‘tkazuvchi organ tomonidan bir yil muddatga harakatsiz rejimga o‘tkaziladi;
- harakatsiz rejimga o‘tkazilgan korxonalar faoliyati bir yil davomida tiklanmagan taqdirda, ro‘yxatdan o‘tkazuvchi organ ularni Tadbirkorlarning yagona davlat reyestridan chiqaradi”.
O‘zbekistonda prezident qarori asosida 2024-yil 1-fevraldan boshlab “Tadbirkorlik subyektlarining barqarorlik reytingi” tashkil etilgandi. Reyting doirasida tadbirkorlik subyektlarining yuqori barqarorligi AAA, AA, A toifalari bilan, o‘rta barqarorligi BBB, BB va B toifalari bilan aniqlanadi. Shu bilan birga, qoniqarli barqarorlikka CCC, CC va C toifalari, quyi barqarorlikka D toifasi beriladi.
2024-yil 1-apreldan tadbirkorlik subyektlariga subsidiya, imtiyoz va preferensiyalar ularning reyting darajasidan kelib chiqqan holda joriy etilishi aytilgandi. Reyting doirasida korxonalar to‘rt toifaga ajratiladi. Xususan, AAA, AA va A toifalar — yuqori barqarorlik reytingi hisoblanadi.
BBB, BB va B toifalar — o‘rta barqarorlik, CCC, CC va C toifalar — qoniqarli barqarorlik, D toifa — quyi barqarorlik reytingidan joy oladi.
Izoh (0)