Президентнинг “Ўзбекистон Республикаси Президентининг айрим ҳужжатларига ўзгартириш ва қўшимчалар киритиш тўғрисида”ги фармони қабул қилинди. Бу ҳақда Адлия вазирлиги хабар берди.
Фармонга кўра, Президентининг айрим ҳужжатларига қуйидагиларни назарда тутувчи ўзгартириш ва қўшимчалар киритилди:
- молия-хўжалик фаолиятини амалга оширмаётган тадбиркорларни белгилаш мезонларини такомиллаштириш;
- янгидан ташкил қилинган тадбиркорларнинг ривожланишини баҳолаш кўрсаткичларини мақбуллаштириш;
- “BBB” тoифадаги тадбиркорларга товарларни импорт қилишда ва товарларни (хизматларни) реализация қилишда тўланадиган ҚҚС суммаларини ўзаро ҳисобга олиш тартибини татбиқ этиш;
- маҳаллий пиво маҳсулотларини реализация қилиш фаолиятини ваколатли органни хабардор қилиш тартибида амалга ошириш.
Бунда Президент фармонига киритилган қўшимчага кўра, молия-хўжалик фаолиятини амалга оширмаётган корхоналарни тугатишда:
- молия-хўжалик фаолиятини амалга оширмаётган корхоналар давлат солиқ хизмати органининг тақдимномасига асосан рўйхатдан ўтказувчи орган томонидан бир йил муддатга ҳаракатсиз режимга ўтказилади;
- ҳаракатсиз режимга ўтказилган корхоналар фаолияти бир йил давомида тикланмаган тақдирда, рўйхатдан ўтказувчи орган уларни Тадбиркорларнинг ягона давлат реестридан чиқаради”.
Ўзбекистонда президент қарори асосида 2024 йил 1 февралдан бошлаб “Тадбиркорлик субъектларининг барқарорлик рейтинги” ташкил этилганди. Рейтинг доирасида тадбиркорлик субъектларининг юқори барқарорлиги ААА, АА, А тоифалари билан, ўрта барқарорлиги BBB, BB ва B тоифалари билан аниқланади. Шу билан бирга, қониқарли барқарорликка CCC, CC ва C тоифалари, қуйи барқарорликка D тоифаси берилади.
2024 йил 1 апрелдан тадбиркорлик субъектларига субсидия, имтиёз ва преференсиялар уларнинг рейтинг даражасидан келиб чиққан ҳолда жорий этилиши айтилганди. Рейтинг доирасида корхоналар тўрт тоифага ажратилади. Хусусан, ААА, АА ва А тоифалар — юқори барқарорлик рейтинги ҳисобланади.
BBB, BB ва B тоифалар — ўрта барқарорлик, CCC, CC ва C тоифалар — қониқарли барқарорлик, D тоифа — қуйи барқарорлик рейтингидан жой олади.
Изоҳ (0)