Poytaxtdagi foydalanilgan buyumlar sotiladigan “Yangiobod” bozori haqida eshitganmisiz? Keyingi paytlarda bu bozorga sayyohlarning ham tashrif buyurishi ancha ortgan. Boisi, u yerda sotiladigan noyob buyumlar xorijliklarda ham katta qiziqish uyg‘otmoqda.
Bozorda yo‘q narsaning o‘zi yo‘q. Bu yerda istagan narsangizni topishingiz va kerak bo‘lmay qolgan har qanday buyumingizni sotishingiz mumkin. Zamonaviy onlayn bozorlarning anʼanaviy ko‘rinishi desa ham bo‘ladi.
Bozor haqiqatan ham rang-barang, yaʼni u yerdan oziq-ovqat mahsulotlarini, yangi kiyim-kechaklarni, shu bilan birga eskilarini ham, allaqachon ishlab chiqarish to‘xtatilgan texnikalarning asbob uskunalarini, uy hayvonlari, qushlar, akvarium baliqlari va eng qizig‘i ko‘p yillik tarixga ega osori atiqalarni ham xarid qilishingiz mumkin.
Darvoqe, sizga bozorga kelishning eng qulay transport vositasi haqida aytib o‘tmadik. “Yangiobod” bozoriga shaharning istalgan burchagidan birgina metro orqali kelishingiz mumkin. Mustaqillikning 30 yilligi munosabati bilan qurilgan yerusti metrosi yo‘nalishining “Yangiobod” bekatida tushib, tashqariga chiqishingiz bilan bozor muhiti sizni qarshi oladi.
Yangiobod ham boshqa bozorlar singari dushanba kuni ishlamaydi. Savdogarlarning so‘zlariga ko‘ra, bozor shanba va yakshanba kunlari “to‘lib-toshadi”. Shundoq ham arzon bo‘lgan buyumlarni, savdolashib yanada arzonroqqa xarid qilsa bo‘ladi.
Quloqqa chalingan g‘alati gap-so‘zlarga qaraganda, bu bozorda odamning jonidan boshqa barcha narsani topish mumkin ekan. Bu gap so‘zlar qanchalik haqiqatga yaqinligini bilmaymiz-u, ammo rostdan ham barcha narsa bor ekan, ishonavering.
Texnika jihozlari: telefon yoki kompyuter sotib olaman desangiz, ehtiyot bo‘lish kerak — bozorda o‘g‘irlangan mahsulotlar ham yo‘q emas.
Bozorda kichik hayvonot olami ham bor — qushlardan tortib turli zotdor itlar-u, rangli baliqqacha. Narxi esa boshqa bozor va zoodo‘konlarga qaraganda hayratlanarli darajada arzon!
-iYngeq7z.jpg)
Eski yoki bir martalik mavsumga chidab beradigan kiyim-kechak izlayotgan bo‘lsangiz ham “Yangiobod” bozori sizga yordam beradi. Tuflilarni holatiga qarab 30 mingdan 50 minggacha, ichkilar kiyimini esa 20-60 minggacha bo‘lgan narxda xarid qilishingiz mumkin.
Agar bolalik yillaringiz bilan bog‘liq xotiralarni eslagingiz kelsa ham albatta bu bozorga tashrif buyuring. Bu yerda kamida 5-6 ta avlodning ermagi bo‘lgan o‘yinchoqlar, onalarimizning sarposiga qo‘yilgan billur idishlar ham bor.
Aslida bunday bozorlar dunyoning har bir nuqtasida bor. Eng qizig‘i, ularning ham o‘z xaridori bor.
Masalan, Parijdagi Sent Uan eski bozorida — antikvar buyumlardan tortib qiziqarli mayda-chuydalargacha bor. Dizaynerlik kiyimlari va buyumlar, qadimiy mebellar, kitoblar, yangi va ishlatilgan elektronikalarni ham topish mumkin.
2004-yilda Berlinda ham eski-tuski bozori ochildi — avvaliga vaqtinchalik yarmarka sifatida, keyinchalik esa muntazam ishlaydigan bozorga aylandi. Faqat asl qadimiy buyumlar qidirsangiz, ehtiyot bo‘lishingiz kerak — har doim zamonaviy buyumlarni sunʼiy ravishda qadimiylashtirilganini uchratish xavfi mavjud.
Bunday bozorlar Madridda, Londonda, Barselonada va Istanbulda ham bor. Aslida ular ko‘p jihatdan foydali. Keraksiz buyumlar axlatxonalarga tashlanmaydi va ularning umri uzayadi. Keyin bu ham tadbirkorlik. Biz arzimas hisoblagan buyumlar bilan ham bir xonadonning qozoni qaynaydi.
Antikvar buyumlar sotiladigan bozor! Eh, mana buni haqiqiy muzey desa bo‘ladi. Ishonavering, bu yerga kelsangiz aniq o‘zingizni boshqa hududga tushib qolgandek his qilasiz. Xo‘sh, buyum antikvar hisoblanishi uchun kamida necha yillik tarixga ega bo‘lishi kerak? Ular haqiqatan ham qimmatmi? Bu kabi savollarimizga tadbirkor Ulug‘bek Mahmudjonov javob beradi.
— Aslida 100-yil saqlangan buyumlarni ham tarixiy desa bo‘ladi. Afsuski, ko‘p insonlar ota-onasidan qolgan eski buyumlarni qadrlamay, ularni tashlab yuborishadi. Ulardan voz kechish emas, qadrlash kerak. Ular mamlakat tarixi haqida so‘zlaydi.
Asosiy xaridorlar xorijliklar, ammo eski buyumlarga qiziqadigan hamyurtlarimiz ham yo‘q emas, — deydi yetti yildan buyon antikvar buyumlar savdosi bilan shug‘ullanuvchi tadbirkor Ulug‘bek Mahmudjonov.
Yangiobod rang-barang va boshqa zoodo‘konlarga qaraganda ancha arzon hayvonot bozori bilan ham mashhur. Bu yerdan rang-barang qushlarni 15 ming so‘mdan boshlab xarid qilishingiz mumkin. Gapiradigan, sheʼr yodlab beradigan qushlarning bahosi esa ancha qimmat. “Yangiobod”ning ko‘rimsizgina akvarium bozorida ham savdo avjida. Bor-yo‘g‘i 5 mingdan boshlab, rang-barang va ko‘zni quvnatuvchi baliqlarni xarid qilishingiz mumkin.
Xullas, “Yangiobod” bozoriga bo‘lgan safarimiz ham yakunlandi. Vaqtingiz bo‘lganida shunchaki bu yerga kelishingizni tavsiya qilamiz. Samimiy insonlar, noodatiy buyumlar va arzon narx navo sizni hayratlantirishi aniq.
Agar bozor haqida yanada ko‘proq ma'lumotga ega bo‘lishni istasangiz, havola orqali maxsus reportajni tomosha qiling. Umid qilamizki, ketgan vaqtingizga achinmaysiz.
Izoh (0)