Rossiyalik tadbirkor Alisher Usmonov Xalqaro qilichbozlik federatsiyasi (FIE) prezidenti etib saylandi.
Shu munosabat bilan Usmonov 2024-yil 30-noyabr kuni Toshkentdagi kongressda saylov yakunlari bo‘yicha OAV uchun bayonot berdi.
“Daryo” muxbirining qayd etishicha, Usmonov Xalqaro qilichbozlik oilasining ishonchi va qo‘llab-quvvatlashi uchun minnatdorlik bildirgan.
“Mening nomzodimni qo‘llab-quvvatlagan 103 ta milliy federatsiyaning fikrini e’tiborsiz qoldira olmadim va nomzodimni yoqlab ovoz bergan har bir federatsiyaga minnatdorchilik bildiraman.
Barchangizni qilichbozlikning yorqin kelajagi va uning jadal rivojlanishiga ishontirmoqchiman. Yaqin o‘tmishda sevimli sportimizni qoralashlar, unga nisbatan tuhmatlar, shuningdek, qilichbozlikni mutlaqo sportga xos bo‘lmagan kurash turlari maydoniga aylantirishga urinishlariga qaramay, buning uchun qo‘limdan kelgan barcha ishni qilaman.
Ma’lumki, menga nisbatan asossiz cheklovlar qo‘llanilmoqda, va men hozirda bu cheklovlarga qarshi sudda e’tiroz bildirmoqdaman. Shu munosabat bilan, men har doim FIE manfaatlarini ko‘zlab ish yuritganimni va bundan keyin ham menga nisbatan qo‘llanilgan huquqiy jihatdan asossiz sanksiyalarning FIE va uning faoliyatiga ta’sir ko‘rsatishiga yo‘l qo‘ymaslik uchun barcha zarur choralarni ko‘rishimni ta’kidlamoqchiman.
Ishonchim komilki, sevimli sportimizning oldida yangi yuksalish davri va yorqin g‘alabalar turibdi. Qilichbozlik eng mashhur olimpiada sport turlari qatoridan mustahkam o‘rin olishga munosib ekanligiga va bunga yaqin yillar ichida erishish mumkinligiga aminman!”, deydi Usmonov.
Toshkentda FIE prezidentligi uchun bo‘lib o‘tgan saylovda Usmonovning raqibi Shvetsiya qilichbozlik federatsiyasi prezidenti Otto Drakenberg bo‘ldi. Usmonov 120 ta, Drakenberg 26 ta ovozni qo‘lga kiritdi.
71 yoshli Usmonov nomzodining ushbu lavozimga ilgari surilishi haqida oktyabr oyi oxirida ma’lum bo‘lgan edi. Uni 100 dan ortiq mamlakat qilichbozlik federatsiyalari qo‘llab-quvvatladi.
Usmonov FIE’ni 2008-yildan buyon boshqarib keladi. 2021-yil noyabr oyida u saylovda yagona nomzod bo‘lib, yangi muddatga federatsiya prezidenti etib qayta saylangan edi. 2022-yilning mart oyida Usmonov Yevropa ittifoqi tomonidan unga qarshi joriy qilingan sanksiyalar tufayli o‘z vakolatlarini to‘xtatdi.
2023-yil mart oyida FIE rossiyalik sportchilarga neytral maqomda musobaqalashishga ruxsat berishga qaror qildi.
Izoh (0)