Xorazm viloyati va Toshkent shahrida kredit mablag‘lari ajratilishiga yordam berishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Bog‘ot tumanida fuqarolar I.Yu. va X.N. tadbirkor S.M.ning ishonchiga kirib, o‘zlarini go‘yoki bank xodimi sifatida tanishtirgan. So‘ng uning tadbirkorlik faoliyatini rivojlantirishi hamda subsidiya asosida uy-joy olishi uchun yuqori lavozimda ishlovchi tanishlari yordamida 10 mlrd so‘m kredit ajratilishida yordam berishlari evaziga 110 ming dollar berishi kerakligini aytgan.
Fuqarolar oldindan 10 ming dollarni olgan vaqtida ashyoviy dalillar bilan ushlangan.
Shuningdek, Shayxontohur tumanida fuqarolar D.M. (muqaddam sudlangan) va J.I. “D.Ph.” MCHJning taʼsischisi va rahbari N.I.ning ishonchiga kirib, unga go‘yoki bank muassasasida ishlovchi tanishlari yordamida 1 mlrd so‘m imtiyozli kredit ajratib berishni vaʼda qilgan.
Buning evaziga 5 ming dollar olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)