Toshkent viloyatining 7 ta hududi — Chinoz, Bo‘stonliq, Ohangaron, Parkent, Bo‘ka va Zangiota tumanlari hamda Angren shahrida turizmni “Oltin halqa” konsepsiyasi asosida rivojlantirish belgilangan. 23-noyabr kuni “Oltin halqa”ga kiruvchi gastronomik turizm bo‘yicha peshqadam Chinoz tumanida turizm infratuzilmasini rivojlantirish yo‘lida navbatdagi qadam tashlandi.
Mazkur hududdan o‘tuvchi M-39 magistral yo‘li bo‘yida tadbirkor tashabbusi bilan qiymati 18 milliard so‘m bo‘lgan majmuaning birinchi bosqichi ishga tushirildi.
Gastronomik, turistik hamda logistik qulaylik yaratishda ahamiyatga ega loyiha o‘z ichiga milliy taomlar restorani, hostel, hammom, avtoturargoh, avtoyuvish shaxobchasini oladi. Loyihaning ikkinchi bosqichi 2025-yil 1-yanvarga qadar ishga tushirilishi mo‘ljallangan bo‘lib, unda 200 ta avtomashinaga mo‘ljallangan keng tarmoqli avtoturargoh, katta yuk mashinalari va yengil mashinalarni yuvish, ularga kompleks ravishda keng ko‘lamli texnik xizmat ko‘rsatish hamda boshqa xizmatlarni amalga oshirish imkoni mavjud bo‘ladi, deydi viloyat hokimligi axborot xizmati mas’uli Asqar Ismoilov.
Tadbirda so‘z olganlarning ta’kidlashicha, loyihaning ahamiyatli tomoni shundaki, u Buyuk ipak yo‘lining bir qismi hisoblanadigan, O‘zbekistonni Qozog‘iston bog‘lovchi “Yallama” posti orqali kirib keluvchi hamda chiqib ketuvchi xalqaro toifadagi yuk tashuvchi va yengil avtomashinalarning ma’lum bir muddat to‘xtab, xavfsiz hordiq chiqarib, taomlanib, texnik sozligini tekshiruvdan o‘tkazish kabi bir qancha xizmatlarni ko‘rsatadi.
Mana shu yerlar chakalakzor bo‘lib yotardi. Men doim nimaga Toshkentdan Namangan, Andijon va Farg‘onaga boraverishda bitta bo‘lsa ham hojatxona yo‘q, choy ichadigan joy yo‘q, derdim. Press-klubda ishlab yurgan paytlarim shunaqa imkoniyat nega M39 yo‘lida yo‘q, derdim. Mana shunday ishlar qilinyapti. Buni davlat qilishi kerak emas, tadbirkorlar qilishi kerak. Davlat buning uchun zo‘r sharoit, yaxshi kreditlar berishi kerak. Tadbirkorlarni qo‘llab-quvvatlash kerak, deydi tadbir ishtirokchisi Sherzodxon Qudratxo‘ja.
Izoh (0)