Spice Girls musiqiy guruhining sobiq a’zosi Viktoriya Bekhem o‘zining muvaffaqiyatli karyerasi, namunali oilasi hamda go‘zallikni saqlab qolish uchun qat’iy turmush tarziga rioya qilishga kuch topa olgani bilan barchaga o‘rnak bo‘la oladi. Viktoriya kundalik ovqatlanish tartibini doim nazorat qiladi, muntazam ravishda harakatda bo‘ladi va o‘z ustida ishlashdan to‘xtamaydi. Buning natijasi esa uning go‘zal va sarvqomat ko‘rinishida aks etmoqda.
Viktoriyaning o‘zi aytganidek, bunday ko‘rinishni saqlab qolish avvaldan rejalashtirilgan kundalik tartibga rioya qilish hamda fidoyilikni talab etadi.
Bekhem xonimning kuni ertalab soat 5:30 da boshlanadi. U birinchi navbatda yugurish yo‘lakchasida sport mashg‘ulotlari bilan shug‘ullanadi. Viktoriya avvalo tez-tez qadamlar bilan yuguradi, keyin o‘rtacha ritmda yugurishda davom etadi. Taxminan 7 kilometr masofa bosib o‘tilgach, yulduz og‘irroq mashqlarga o‘tadi. 30 daqiqa davomida u qorin, oyoq va qo‘llari uchun sport mashqlarini bajaradi. Tonggi badantarbiyani tugatgach, Viktoriya gigiyenik ishlarga o‘tadi va o‘zi uchun nonushta tayyorlaydi.
Viktoriya tongni ikki choy qoshiq olma sirkasi va suvdan boshlaydi. Bu uning tanasini tozalashga va metabolizmni yaxshilashga yordam beradi. Nonushta uchun don va chia urug‘idan tayyorlangan smuzi ichadi. Shuningdek, yulduz har kuni vitamin va antioksidantlarga boy avokado va ozgina yong‘oq iste’mol qiladi. Agar kun davomida ochlik bezovta qilsa, yulduz bir bo‘lak butun donli undan tayyorlangan nonni tuz sepib iste’mol qilishi mumkin.
Tushlik va kechki ovqat uchun tadbirkor odatda doim bir xil taomni iste’mol qiladi. Uning turmush o‘rtog‘i Devid Bekhemning so‘zlariga ko‘ra, Viktoriya 25 yil davomida har kuni losos balig‘i va sarsabil (sparja) iste’mol qiladi. Ushbu taomni u ikkiga bo‘lib, ma’lum vaqt orasida yeydi. Tushlikdan keyin bir necha soat o‘tgach Viktoriya yana sport mashg‘ulotlariga sho‘ng‘ib ketadi.
Kun davomida u uy yumushlari va tadbirkorlik faoliyati bilan bog‘liq ishlar bilan shug‘ullanadi va soat 18:00 atrofida kechki ovqat tayyorlaydi. Viktoriyaning sport mashg‘ulotlari haftasiga 6 kun davom etadi. Faqatgina biror tadbir yoki jiddiy sabablar tufayli istisno kunlar bo‘lishi mumkin. Oddiy odam bunday kun tartibiga amal qilishi mushkul, ammo Viktoriya Bekhem uzoq yillar davomida bunga amal qilib kelmoqda.
Ammo yulduzning bunday og‘ir mashg‘ulotlari va juda kam kaloriya iste’mol qilish talab etiladigan odati barchaga birdek mos kelmaydi, chunki kaloriyalar cheklovi va mashaqqatli sport ba’zi ayollar salomatligiga zarar yetkazishi mumkin.
Shu sababli mashhurlarning ko‘rsatmalariga ko‘r-ko‘rona amal qilish o‘rniga, shifokorlar va ishonchli fitnes murabbiylar maslahatlariga quloq tutgan ma’qul. Ular har bir odam uchun individual bo‘lgan va sog‘liqqa zarar yetkazmay ozishga yordam beradigan tavsiyalarni beradi. Qolaversa, mustahkam salomatlik uchun ratsionda xilma-xil oziq-ovqatlar bo‘lishi, jumladan, nafaqat oqsillar va o‘simlik tolalari, balki yog‘lar va uglevodlar ham bo‘lishi muhim. Vaqti-vaqti bilan o‘zingizni ozgina shirinlik bilan siylashning hech ham yomon jihati yo‘q.
Izoh (0)