Toshkentda Xalqaro qilichbozlik federatsiyasining navbatdagi Kongressi muvaffaqiyatli o‘tkazildi, deb xabar berdi MOQ matbuot xizmati.
Maʼlum qilinishicha, Toshkent shahrida 2027-yil kattalar o‘rtasidagi jahon chempionatini qabul qiladigan bo‘ldi. Rejaga ko‘ra, musobaqa 20—28-iyul kunlari bo‘lib o‘tadi.
Shuningdek, tadbirda yil yakunlariga bag‘ishlangan taqdirlash marosimi ham bo‘lib o‘tdi. Unda yoshlar o‘rtasida jahon reytingini peshqadam sifatida yakunlagan sablyachimiz Fernanda Errera ham mukofotlandi.
Avvalroq, rossiyalik tadbirkor Alisher Usmonov Xalqaro qilichbozlik federatsiyasi (FIE) prezidenti etib saylangandi.
71 yoshli Usmonov nomzodining ushbu lavozimga ilgari surilishi haqida oktyabr oyi oxirida ma’lum bo‘lgan edi. Uni 100 dan ortiq mamlakat qilichbozlik federatsiyalari qo‘llab-quvvatladi.
Usmonov FIE’ni 2008-yildan buyon boshqarib keladi. 2021-yil noyabr oyida u saylovda yagona nomzod bo‘lib, yangi muddatga federatsiya prezidenti etib qayta saylangan edi. 2022-yilning mart oyida Usmonov Yevropa ittifoqi tomonidan unga qarshi joriy qilingan sanksiyalar tufayli o‘z vakolatlarini to‘xtatdi.
2023-yil mart oyida FIE rossiyalik sportchilarga neytral maqomda musobaqalashishga ruxsat berishga qaror qildi.
Izoh (0)