AQSH hozir Suriya bilan munosabatlarni tiklash yoki yaxshilash vaqti emas, deb hisoblaydi, mamlakat rasmiylari bu haqda o‘z ittifoqchilarini xabardor qilgan. Davlat departamenti matbuot xizmati rahbari Ned Prays brifingda shunday bayonot berdi.
“Biz ittifoqchilarimiz va hamkorlarimizga hozir munosabatlarni normallashtirish va yaxshilash vaqti emasligini aniq qilib aytdik. Mamlakatlar Suriya prezidenti Bashar Asadning inson huquqlari borasidagi ayanchli tarixini esga olishi kerak”, — dedi u Rossiya, Suriya va Turkiya vakillari o‘rtasidagi uch tomonlama aloqalar haqidagi savolga javob berar ekan. Turkiya AQSHning NATOdagi ittifoqchisi hisoblanadi.
Avvalroq Turkiya prezidenti Rajab Toyyib Erdo‘g‘on Rossiya prezidenti Vladimir Putin bilan telefon orqali muloqot qilgandi. Tomonlar Suriyadagi mojaroni tartibga solish masalalarini muhokama qilgan, xususan, Rossiya, Suriya va Turkiya mudofaa vazirlari va razvedka xizmatlari rahbarlarining 2022-yil dekabr oyida Moskvada bo‘lib o‘tgan uchrashuviga ijobiy baho berilgan. Erdo‘g‘onning o‘zi Asad bilan “vaqti kelganda” muzokaralar olib borilishini istisno etmagan va hozirda mamlakatlar o‘rtasidagi aloqalar maxsus xizmatlar darajasida saqlanib qolganini ta’kidlagan.
Ayni paytda Turkiyaning Suriya va Iroq shimolida “Changal-qilich” harbiy operatsiyasi olib borilmoqda. Bu Turkiya hukumati terrorchi deb hisoblagan Kurdiston ishchilar partiyasiga qarshi uyushtirilmoqda.
Izoh (0)