Hande Erchel yangi loyihaga qo‘l urdi, “Qo‘rg‘on sirlari” suratga olinayotgan uy sotuvga qo‘yildi: turk kinosi yangiliklari

O‘tgan haftada sevimli aktyorlaringiz hayotida nimalar bo‘lganini kuzatishga ulgurmagan bo‘lsangiz, quyidagi maqolada turk shou-biznesi olamidagi eng so‘nggi va qiziqarli yangiliklarni to‘pladik.

Hande Erchel yangi loyihalar taklifi ustida bosh qotirmoqda

Hozircha aktrisaning qaysi serial yoki filmda suratga tushishi haqida ma’lumot yo‘q, ammo Birsen Altuntashning xabar berishicha, yaqin orada aktrisa barchasini ma’lum qiladi. Erchel so‘nggi marta “Mutlaqo boshqacha” serialida ishtirok etdi, 2024-yil yoz oyida esa Barish Arduch bilan “Uni shamolga qoldiring” filmida rol o‘ynadi. Yangi film hozirda ishlab chiqarish bosqichida.

Pinar Deniz va Kaan Yildirim turmush qurishdi

To‘y haqida internetda tarqalgan mish-mishlar haqiqat bo‘lib chiqdi. Uch fasldan iborat “Adolat” seriali yulduzi Pinar Deniz va uning qallig‘i Kaan Yildirim turmush qurdi. To‘y marosimi Italiyaning Rim shahrida, yaqinlar davrasida bo‘lib o‘tdi. Shuningdek, juftlik Turkiyada hech qanday bayram uyushtirmasliklarini ma’lum qildi.

“Qo‘rg‘on sirlari” yulduzi Pelin Akil ikki yosh — Afra Saracho‘g‘li va Mert Ramazon Demir o‘rtasidagi munosabatlar haqida fikr bildirdi

Afra va Mertning yarashishi haqidagi xabarlardan so‘ng turk jurnalistlari juftlik munosabatlari haqida ma’lumot olish uchun ularning umumiy tanishlariga murojaat qildi. Bu safar ularning nishoni ostida “Qo‘rg‘on sirlari” loyihasining uchinchi mavsumida Diyar rolini ijro etgan Pelin Akil bo‘ldi. Aktrisa Afra va Mert haqida hech qanday ma’lumotga ega emasligini, ammo ular hozirda yaxshi munosabatda ishlayotganini aytdi.

Kerem Bursinning yangi serialdagi partnyorlari kim ekanligi ma’lum bo‘ldi

Birsen Altuntashning so‘nggi ma’lumotlariga ko‘ra, Kerem Bursin ishtirokidagi yangi serial Disney+ da emas, balki Netflix’da chiqadi. U serial prodyuseri bo‘lgan Gupse Ozay va “Ajoyib juftlik” serialida Kerem bilan birga ishlagan Oyku Karael bilan rol o‘ynaydi. Syujet haqida hali ko‘p narsa ma’lum emas, hozircha aktrisalar opa-singil rolida chiqishi, Bursin esa Kaan ismli yigit rolini ijro etishi aytilgan.

“Sapfir” seriali va aktyor Haluk Bilginer 2024-yilgi xalqaro Emmi mukofotiga nomzod bo‘ldi

“Sapfir” seriali va aktyor Haluk Bilginer 2024-yilgi xalqaro Emmi mukofotiga nomzodlar ro‘yxatiga kiritildi. Biroq dizi muxlislari hakamlar hay’atining ushbu tanlovidan norozi. “Ota” va “Shaxsiyat” teleseriallaridagi ajoyib rollari bilan mashhur bo‘lgan hamda Anjelina Joli bilan birga ishlagan Halukka e’tirozlar yo‘q, albatta. Ammo tanlangan serial muxlislar nazarida juda sifatsiz va bunday nominatsiyada mukofot uchun kurashadiganlar ro‘yxatida bo‘lishga loyiq emas.

Chetin Tekindor va Oznur Sercheler “Qo‘rg‘on sirlari” serialini tark etmaydi

 “Qo‘rg‘on sirlari” serialining uchinchi faslida ayrim aktyorlarning ishtirok etishi haqidagi ko‘pchilikni tashvishga solayotgan savolga oydinlik kiritildi. Turk insayderlarining xabar berishicha, Xolis og‘a va Asuman uyga qaytadi, shuning uchun ularning loyihani tark etishidan xavotirlanishga hojat yo‘q.

Sabanjilar oilasi “Qo‘rg‘on sirlari” seriali suratga olinayotgan uyni sotuvga qo‘ydi

Mashhur serial Sabanjilar oilasiga tegishli qasrda suratga olingan. Ijara uchun sarflangan barcha mablag‘lar muhtojlarga yordam berish uchun Turkiya xayriya tashkilotlariga yuboriladi. TV100 nashri mazkur ko‘chmas mulkni 1,25 milliard turk lirasiga ($36 600 750) sotishga qaror qilingani haqida xabar berdi.

Akin Akinozyu va Sandra Pestemaljiyan munosabatlariga nuqta qo‘ydi

Dizi olamida yana bir ajrim xabari: “Beqaror” seriali yulduzi Akin Akinozyu va Sandra Pestemaljiyan munosabatlarini uzdi. Ular 2019-yil boshidan birga bo‘lgan. Akin muntazam ravishda qallig‘iga munosabatlarni qonuniylashtirish haqida va’dalar bergan, biroq o‘z so‘zidan qaytgan va juftlik orasida munozaralar paydo bo‘lgan.