Afg‘onistondan qochib, Rossiyadan boshpana olishga uringan afg‘on jurnalisti Kobra Hassaniy 25-iyun kuni Moskvadan Kobulga uchib ketdi, deya Hassaniyning advokatlariga tayanib, “Fontanka” xabar berdi.
Kobra Hassaniy 2021-yil avgustigacha Afg‘oniston televideniyesida ishlagan va mamlakatda ayollar huquqlari uchun kurashgan. U “Tolibon” hokimiyatga kelganidan ko‘p o‘tmay Afg‘onistonni tark etgan va Kiyev davlat universitetining ingliz tili bo‘limiga o‘qishga kirgan, biroq Ukrainada urush boshlanishi bilan u Yevropaga ko‘chib o‘tishga qaror qilgan.
Ukrainadan qochqinlarni olib ketayotgan mikroavtobus Polsha o‘rniga Rossiyaga yetib kelgan. Hassaniy yana Yevropaga yetib olishga uringan, biroq 2022-yilning may oyida Sankt-Peterburgdan chiqib ketayotganda u boshqa afg‘on qochqinlari bilan birga chegarani noqonuniy kesib o‘tgani uchun hibsga olingan.
Hassaniy tergov izolyatoriga jo‘natilgan, so‘ngra Krasnoye Selodagi Chet el fuqarolarini vaqtincha saqlash markaziga o‘tkazilgan. Sud uni ikki yilga koloniyaga hukm qilgan, biroq tergov izolyatoridagi vaqtni hisobga olib, jurnalistni ozod qilgan.
Sud hukmidan keyin Hassaniy Rossiyani tark eta olmagan, chunki uni tark etmaslik majburiyati uning ona tilida (forscha) sud qarori chiqarilgunga qadar amal qilgan. Prokuratura esa chegarani noqonuniy kesib o‘tish ishi bo‘yicha chiqarilgan hukm ustidan apellyatsiya shikoyati berib, jurnalistning hibsda o‘tkazgan kunlarini sanashni so‘ragan, biroq sud buni rad etgan.
Hassaniy advokatlarining aytishicha, boshpana berish rad etilganidan keyin uning boshqa davlatlarga borish uchun ko‘p imkoniyatlari bo‘lgan, ammo bu kuch, vaqt va pul talab qilgan.
Advokatlar Hassaniyning Kobulga uchganini Sankt-Peterburgdagi afg‘on diasporasidan bilishgan. Jurnalistning himoyachisi Yelena Fadeyevaning aytishicha, Hassaniy Rossiyada qolishga ortiq kuchi yo‘qligini va unga tahdid solayotgan xavf-xatarga qaramay, Afg‘onistonga qaytishdan boshqa imkoniyatlarni ko‘rmagan.
Kobra Hassaniy o‘z vatanida uni “Tolibon” tomonidan o‘lim va ta’qiblar kutayotganini aytgan. Uning advokati Rossiyadan boshpana so‘rash uchun ariza bergan, ammo mazkur so‘rov rad etilgan.
Izoh (0)