AQSHning BMTdagi vakili Linda Tomas Grinfild xalqaro hamjamiyatning “Tolibon”ni Afg‘onistondagi ayollar huquqlarini kengaytirishga undashga qaratilgan harakatlari hozircha samarasiz ekanini maʼlum qildi. Bu haqda Hasht-e Subh Daily nashri xabar berdi.
Tomas Grinfild 18-aprel, payshanba kuni bo‘lib o‘tgan matbuot anjumanida jurnalistlarga afg‘on ayollarining umidlari poymol qilinishidan xavotirda ekanini aytgan. Afg‘onistonda inson huquqlar bilan bog‘liq vaziyat hali-beri o‘zgarmasligini maʼlum qilgan.
“Menimcha, bu juda tushkun vaziyat. Biz ko‘p narsaga erishmadik. Afg‘on ayollari umidlarini yo‘qotayotganidan xavotirdaman”, — degan AQSH vakili.
Tomas Grinfildga ko‘ra, inson huquqlari, xususan, ayollar huquqlari sohasida o‘tgan 20 yil davomida erishilgan yutuqlar “Tolibon” Afg‘oniston ustidan nazoratni qayta tiklaganidan so‘ng yo‘qotilgan. AQSHning “Tolibon” liberallashuvi borasidagi taxminlari o‘z isbotini topmagan.
“Men 1990-yillarda “Tolibon” Afg‘onistonni birinchi marta o‘z nazoratiga olganida afg‘on ayollari bilan bog‘liq masalalar ustida ishlaganman va biz muvaffaqiyatga erishganmiz. Ammo hozir biz sodir bo‘layotgan voqealar haqiqatan ham mamlakat taraqqiyotini vayron qilganini ko‘rmoqdamiz”, — degan Tomas Grinfild.
AQSH Davlat departamenti matbuot kotibi o‘rinbosari Vedant Patel agar afg‘on ayollari va qizlari jamiyat va iqtisodiyot masalalarida ishtirok etishdan chetlashtirilsa, “Tolibon” qonuniylikka erisha olmasligini maʼlum qilgan. U ayollar va qizlarning teng huquqliligi Amerikaning Afg‘onistondagi siyosatining asosiy tamoyili ekanini taʼkidladi.
Izoh (0)