O‘n minglab afg‘onlar deportatsiya muddati tugamasdan Pokistonni tark etmoqda. Bu haqda Deutsche Welle xabar berdi.
Birlashgan Millatlar Tashkilotining qochqinlar bo‘yicha agentligi yaqinlashib kelayotgan inson huquqlari falokatidan ogohlantirmoqda.
Pokiston hukumati 31-oktyabrgacha muddat belgilaganidan keyin afg‘onlar vatanlariga qaytishga majbur bo‘lmoqda. BMT va Xalqaro migratsiya tashkilotining bildirishicha, 3-15-oktyabr kunlari o‘n minglab afg‘on Pokistonni tark etgan.
“Biz Pokiston hukumatini inson huquqlari falokatiga yo‘l qo‘ymaslik uchun kech bo‘lmasdan turib, afg‘on fuqarolarining majburiy qaytarilishini to‘xtatishga chaqiramiz. Ishonamizki, deportatsiyaga uchraganlarning ko‘pchiligi Afg‘onistonga qaytsa, o‘zboshimchalik bilan hibsga olish, qiynoqlar, shafqatsiz va boshqa g‘ayriinsoniy muomalalar kabi inson huquqlari buzilishiga duch keladi”, — dedi ikki idora vakillari.
Pokistonlik Nobel mukofoti sovrindori Malala Yusufzay ham bu siyosatni qoraladi.
“Tolibon” ta’qibidan qochgan afg‘on qochqinlari — bolalar, ayollar, erkaklar, oqsoqollar boshqa to‘siqlar va ta’qiblarga emas, qo‘llab-quvvatlash, qadr-qimmat va xavfsizlikka loyiqdir. Men BMT ekspertlarining chaqirig‘iga qo‘shilaman va Pokiston hukumatini ommaviy deportatsiya bo‘yicha shoshqaloq siyosatini qayta ko‘rib chiqishga chaqiraman, — deydi u.
Yillar davomida afg‘onlar urush va “Tolibon”dan qochib, qo‘shni Pokistondan boshpana izlab kelgan. Pokiston hukumatiga ko‘ra, mamlakatda 4,4 millionga yaqin afg‘on qochqinlari bor, ulardan 1,7 millioni hujjatsiz.
Pokistonning ta’kidlashicha, noqonuniy muhojirlarning yangi ommaviy deportatsiyasi biron bir millatni nishonga olmaydi. Mamlakat rasmiylari hibsga olinganlarning hech biriga shafqatsiz munosabatda bo‘lmasligini da’vo qilmoqda.
Izoh (0)