Afg‘onistonda “Tolibon” vakillari tomonidan hibsdagi xotin-qizlarga nisbatan jinsiy zo‘ravonlik qilish holatlari yuz bergan. Bu haqda AQSH davlat departamenti hisobotiga asoslanib, Aamaj News nashri xabar berdi.
Manbada aytilishicha, mamlakatning shimoliy tumanlarida hibsga olingan 90 nafar ayoldan 16 tasi “Tolibon” vakillari tomonidan zo‘rlanganidan so‘ng homilador bo‘lib qolgan. Hibsdagi ayollar, asosan, Juzjon Faryob va Samangan hududlaridan bo‘lgan.
Shuningdek, ayollardan to‘rt nafari takroriy zo‘rlanishdan keyin “Tolibon” tomonidan qatl etilgan. Qatl sababi maʼlum qilinmagan.
Oldinroq AQSH davlat departamenti bir qator mamlakatlarda, jumladan, Afg‘onistonda 2023-yilda inson huquqlari ahvoli haqidagi yillik hisobotini eʼlon qilgan edi. Unda Kobulning bu yo‘nalishdagi xatti-harakatlari qattiq tanqid qilinadi. Xususan, hisobotda “Tolibon” aʼzolarining 2023-yil 14-may kuni mahbus ayollarga qilgan jinsiy tajovuzi qoralangan.
Hisobotga ko‘ra, Afg‘oniston shimolidagi “Tolibon” harakati aʼzolari tomonidan tez-tez sodir etilayotgan jinsiy zo‘ravonlik holatlari tufayli hibsdagi ayollar homilasini oldirishga majbur bo‘lmoqda. “Tolibon” rasmiylari ham mahkuma ayollarning homilasini uchinchi va beshinchi oyda oldirishni buyurgan.
Manbada aytilishicha, o‘tgan yili “Tolibon” vakillari tomonidan zo‘rlash va ko‘p qon ketishi tufayli kasal bo‘lib qolgan 48 nafar ayol Faryob, Samangan va Juzjon hududlaridagi markaziy shifoxonalarga olib ketilgan. AQSH davlat departamenti, shuningdek, 2023-yilda Afg‘onistonda bolalarning majburan turmushga berilishi, ayollarga nisbatan kamsitish, sog‘liqni saqlash xizmatidan foydalana olmaslik va nomusga tegish holatlari haqida xabar bergan.
Izoh (0)