Joriy yil 16-iyul kuni Qashqadaryo viloyati Ko‘kdala tumanida gaz zapravka portlashi oqibatida to‘rt kishi halok bo‘lgan. Maʼlumotlarga ko‘ra, fojiada vafot etgan va jarohatlanganlarga tovon pullari to‘lab berilmoqda.
Ko‘kdaladagi portlashda halok bo‘lgan to‘rt nafar fuqaro oila aʼzolariga 100 million so‘mdan kompensatsiya to‘lab berilmoqda. Shuningdek, turli darajada tan jarohati olgan 15 nafar fuqaroga 50 million so‘mdan moddiy yordam ko‘rsatilmoqda. Bu haqda tuman hokimligi axborot xizmati “Kun.uz”ga maʼlum qilgan.
Aniqlanishicha, gaz to‘ldirish stansiyasi rahbari ham yong‘in oqibatida vafot etgan. Portlash natijasida shoxobcha hovlisidagi konteynerlardan biri restoran hududiga uchib tushgan va natijada restoranda ham yong‘in boshlangan. U yerda ham vafot etganlar bor.
16-iyul kuni Ko‘kdala tumani tibbiyot birlashmasiga kuyish tan jarohatlari bilan yetti nafar bemor shifoxonaga keltirilgan. Ulardan ikki nafarining holati og‘ir va reanimatsiyaga yotqizilgan. Besh nafari turli darajadagi tan jarohatlari bilan murojaat qilgan. Kerakli tibbiyot mutaxassislari jalb etilgan. Maʼlum bo‘lishicha, shifoxonadagi bemorlarning barchasi stansiyada ishlovchi xodimlar bo‘lgan.
Gaz zapravkadagi portlash yuzasidan jinoyat ishi qo‘zg‘atilgan. Jinoyat ishi doirasida sud-tibbiy, yong‘in kelib chiqishini aniqlash bo‘yicha sud-kimyoviy, biologiya, kriminalistika va yong‘in texnikaviy ekspertizalari tayinlangan.
Avvalroq Farg‘onadagi gaz zapravkada kuchli portlash yuz bergan edi. Aybdorlarga sud hukmi o‘qilgan, qurbonlar oilasiga tovon pullari belgilandi.
Izoh (0)