NATO kuchlarining Ukrainada paydo bo‘lishi butun dunyo uchun halokatli oqibatlarga olib keladi va alyansning Rossiyaga qarshi urushga kirishishini anglatadi.
Bu haqda Rossiya TIV rasmiy vakili Mariya Zaxarova brifingda ma’lum qildi.
“Ehtimol, ular NATO kontingentlarining Ukraina hududida paydo bo‘lishi alyansning mamlakatimizga qarshi urushga kirishishini anglatishini tushunmayotgandir? Biz bu haqda ularga bir necha bor aytganmiz, chunki bu nafaqat Yevropa uchun, balki butun dunyo uchun halokatli oqibatlarga olib keladi”, dedi Zaxarova.
Avvalroq Estoniya tashqi ishlar vaziri Margus Saxk Ukrainaga Yevropa davlatlarining harbiy kuchlarini yuborish zarurligi haqida aytib o‘tgandi.
AQSH prezidenti Jo Bayden Ukrainaga Rossiya hududiga zarba berish uchun uzoq masofali qurollardan foydalanishga ruxsat berganidan keyin Kiyev va Moskva o‘rtasidagi vaziyat yanada keskinlashdi.
19-noyabr kuni ukrainalik harbiylar Amerikaning ATACMS raketalari yordamida Bryansk viloyatidagi harbiy obyektni o‘qqa tutgani haqida xabar berilgan edi.
Bunga javoban Rossiya 21-noyabr kuni Dnepr bo‘ylab qit’alararo ballistik raketa uchirdi.
Hujum Astraxan viloyatidagi poligondan amalga oshirilgani aytilmoqda. Ushbu ma’lumotning mustaqil tasdig‘i mavjud emas. Qit’alararo ballistik raketa besh ming kilometr masofani bosib o‘tishi mumkin, ammo ularning ba’zilari to‘qqiz ming kilometrdan ortiq masofaga mo‘ljallangan.
Shuningdek, brifing chog‘ida Mariya Zaxarovaga jonli efirda qo‘ng‘iroq bo‘lgani va noma’lum erkak telefon orqali Zaxarovaga ballistik raketa zarbalari haqida bayonot bermaslikni aytgani aks etgan videolar ijtimoiy tarmoqlarda tarqaldi.
Izoh (0)