Yevropa diplomatiyasi rahbari Josep Borrel 2024-yil oxirigacha Yevropa ittifoqi Ukrainaga 1 million o‘q-dori yuborish rejasini bajarishini aytdi.
Unga ko‘ra, Ukraina qurolli kuchlari allaqachon 980 ming dona snaryad olgan. “Boshqa kelishuvlar va tashabbuslarni hisobga olgan holda, Ukraina yil oxirigacha Yevropadan 1,5 millionta snaryad oladi”, deya qo‘shimcha qildi Borrel.
“Biz buni deyarli bajardik. Biz allaqachon 980 mingdan ortiq snaryad yetkazib berdik va tez orada 1 million snaryadni taqdim qilamiz. Bilaman, biz bahorgacha bu darajaga erishish majburiyatini olgan edik, belgilangan muddatda ulgura olmadik. Lekin yil oxirigacha buni uddalay olamiz. Buning uchun esa biz sezilarli darajada tezlashdik”, dedi Josep Borrel.
Yevropa ittifoqi oliy vakilining so‘zlariga ko‘ra, snaryadlarni Ukrainaga yetkazib berish muddatlari ishlab chiqarish quvvati pastligi sababli kechiktirilgan. Uning aniqlik kiritishicha, Yevropa ittifoqi ishlab chiqarish quvvatini oshirdi, bu esa Ukraina Qurolli kuchlarini hozirgi darajada o‘q-dorilar bilan ta’minlashni davom ettirish imkonini beradi.
Josep Borrel, shuningdek, Yevropa ittifoqi rasmiylari Ukrainaga qurol va snaryadlarni tezroq yuborishi mumkinligini ta’kidladi, ammo “har bir qadam juda uzoq muhokamalarni talab qilgani”ni aytdi. Borrel tushuntirganidek, YI keskinlashuvdan qo‘rqqan ba’zi a’zo davlatlarning xavotirlarini yengishiga to‘g‘ri keldi.
9-noyabr kuni Josep Borrel Kiyevga tashrif buyurdi. Ukraina rasmiylari bilan uchrashuvdan so‘ng u 2025-yilning martigacha Yevropa ittifoqi 15 ming ukrainalik harbiy xizmatchini qo‘shimcha ravishda tayyorlashini ma’lum qildi. Yevropada o‘qitilgan harbiy xizmatchilarning umumiy soni 75 mingga yetadi.
Izoh (0)