Yevropa diplomatiyasi rahbari Josep Borrel BMT Isroil hukumati tomonidan “barcha jabhada” hujumga uchraganini aytdi.
Misol tariqasida u oktyabr oyi boshida Isroil Knesseti BMTning Yaqin Sharqdagi Falastinlik qochqinlarga yordam ko‘rsatish agentligi (UNRWA) faoliyatini taqiqlovchi qonun loyihasini ma’qullaganini eslatdi.
“BMT bosh kotibi Antonio Guterres antisemit sifatida qabul qilinmoqda, UNRWA terrorchi sifatida qabul qilinmoqda, butun BMT tizimi hujumga uchramoqda”, dedi Borrel Bryusseldagi Yevropa Ittifoqi sammitida.
2-oktyabr kuni Isroil Tashqi ishlar vazirligi Antoniu Guterrishni persona non grata deb e’lon qildi va uning mamlakatga kirishini taqiqladi. Qaror Guterrish Eronning raketa hujumini “ochiq qoralamagani” uchun qabul qilingani aytilgan.
Josep Borrel, shuningdek, YI Kengashi sammit chog‘ida Isroil harbiylarining Livandagi Muvaqqat kuchlar bazasiga (UNIFIL) hujumini qoralashiga umid bildirdi. U yerda bir necha nafar tinchlikparvar kuchlar yaralangan, dedi Borrel. BMT tinchlikparvar kuchlarining xabar qilishicha, 13-oktyabr kuni Isroil armiyasi ular qarorgohini tankdan o‘qqa tutgan.
Isroil Tashqi ishlar vazirligi voqeani baxtsiz hodisa deb atadi. Isroil bosh vaziri Binyamin Netanyaxu "Hizbulloh" UNIFIL orqasida yashirinib, tinchlikparvar kuchlardan “tirik qalqoni” sifatida foydalanayotganini aytdi.
Izoh (0)