Yevropa Ittifoqi KXDR Rossiyaga o‘z qo‘shinlarini Ukrainaga qarshi urushda qatnashish uchun jo‘natayotgani haqidagi xabarlarning ko‘payishidan chuqur xavotir bildirdi.
“Agar bunday maʼlumotlar tasdiqlansa, bu KXDR tomonidan Yevropa hamda global tinchlik va xavfsizlik uchun jiddiy oqibatlarga olib keladigan bir tomonlama dushmanlik harakati sifatida qabul qilinadi”, deyiladi YI diplomatiyasi rahbari Josep Borrelning bayonotida.
Borrelning ta’kidlashicha, Shimoliy Koreyaning urushdagi ishtiroki “xalqaro huquqni, jumladan, BMT Nizomining eng fundamental tamoyillarini jiddiy buzish bo‘ladi”. Bundan tashqari, YI Moskva va Pxenyan o‘rtasidagi harbiy hamkorlikning chuqurlashishini, xususan, “BMT Xavfsizlik Kengashining ko‘plab rezolyutsiyalarini qo‘pol ravishda buzayotgan” qurol-yarog‘ yetkazib berishni keskin qoralaydi.
Shu munosabat bilan YI Shimoliy Koreyani Rossiyaning noqonuniy harbiy harakatlarini qo‘llab-quvvatlashni to‘xtatishga chaqirdi, shuningdek, o‘z harakatlarini, jumladan, javob choralarini xalqaro hamkorlar bilan muvofiqlashtirishini eslatib o‘tdi.
“Shimoliy Koreyaning ushbu harakatlari Rossiya mintaqada va butun dunyoda qanday qilib beqarorlik va keskinlikni keltirib chiqarayotganini ko‘rsatadi”, deb ta’kidladi Borrel.
Uning qo‘shimcha qilishicha, “muzokaralar olib borishga tayyorligini bildirganiga qaramay, Rossiya adolatli, keng qamrovli va mustahkam tinchlikdan samimiy manfaatdor emas”.
“Rossiya rasmiylari Pxenyanning yadro quroliga ega bo‘lish istagini qo‘llab-quvvatlab, Rossiyaning BMT Xavfsizlik Kengashi a’zosi sifatidagi mas’uliyatiga putur yetkazmoqda”, deydi diplomat.
Rosssiya prezidenti Vladimir Putin 24-oktyabr kuni BRIKS sammiti doirasida ilk bor mamlakatida Shimoliy Koreya harbiylari borligi haqidagi xabarlarga munosabat bildirdi.
Putin tegishli savolga javob berar ekan, KXDR bilan strategik hamkorlik to‘g‘risidagi shartnomani eslatib o‘tdi.
“Bugun, menimcha, bizning strategik hamkorlik to‘g‘risidagi shartnomamiz ratifikatsiya qilindi. Unda 4-modda mavjud. Biz Shimoliy Koreya rahbariyati kelishuvlarimizga jiddiy yondashishiga hech qachon shubha qilmagan edik. Bu modda doirasida nima va qanday yo‘l tutishimiz — bizning ishimiz”, dedi Rossiya yetakchisi.
Janubiy Koreya razvedkasi ma’lumotlariga ko‘ra, Pxenyan Rossiyaga 12 ming askar jo‘natishi mumkin va ularning bir qismi allaqachon Uzoq Sharqdagi bazalarga yetib borgan. Ular ehtimol Ukraina bilan urushga jo‘natilishi mumkin, shimoliy koreyalik raketa ofitserlari esa allaqachon urushda qatnashayotgani aytilgandi. Biroq Shimoliy Koreya o‘z askarlarini urushda ishtirok etish uchun Rossiyaga yuborgani haqidagi ma’lumotni “asossiz mish-mishlar” deb atagan.
Izoh (0)