Bu mashhurlarning barchasiga shon-shuhrat cho‘qqilariga chiqish tashqi ko‘rinishi jihatdan ustunroq bo‘lgan hamkasblariga qaraganda ancha qiyin kechgan. Lekin ular chiroyli chehra aktrisa uchun eng muhim narsa emasligini isbotlay olishdi.
Meril Strip
Hozirda kinoyulduzlardan biri sifatida tan olingan Meril Strip filmografiyasida mashhur filmlardagi o‘nlab rollar mavjud. Bundan tashqari, u uch marotaba “Oskar” mukofoti sohibasi, ushbu mukofotga yigirma martadan ortiq nomzod bo‘lgan, bu esa jahon rekordi hisoblanadi.
Ammo aktyorlik faoliyatining boshida uni iste’dodsiz va xunuk deb atashgan. Faoliyatining dastlabki davrlarida Meril Strip “King Kong” filmidagi kastingga kelgan, lekin uni hatto sinovga ham qo‘yishmagan va prodyuser uni “burni qiyshiq biya” deb haqorat qilgan. Aktrisa bunga munosib javob qaytarib, shunday degan: “Sizni xafa qilgan bo‘lsam, uzr. Ammo men qanday bo‘lsam, shundayman.”
Uyga qaytgach, u kechasi bilan yig‘lab chiqqan. Tinchlangach, o‘ziga bir umr tashqi qiyofasini birovning didiga moslashtirmaslikka va’da bergan.
Sara Jessika Parker
Uning tashqi ko‘rinishi haqiqatan ham o‘ziga xos: yuzi cho‘zinchoq, burni uzun, ko‘zlari kichkina, tishlari yirik va pastki jag‘i katta. Biroq jozibasi va iste’dodi mo‘l-ko‘l. U mashhur serialidagi qahramoni orqali bir necha avlod tomoshabinlarining sevimli aktyoriga aylanganiga hayron qolmasa ham bo‘ladi. Ushbu mashhur roli bilan u go‘zal bo‘lmasa-da, uslub va noziklik timsoli bo‘lish mumkinligini yaqqol isbotladi.
Tilda Suinton
Aktrisa o‘zining o‘ziga xos tashqi ko‘rinishiga asosiy e’tiborni qaratib, uni noyob brendga aylantirdi, chunki aynan shu xususiyati unga eng qiziqarli va g‘ayrioddiy rollarni olish imkonini beradi. Katta iste’dodi tufayli u “Narniya solnomalari”dagi Oq jodugar bo‘ladimi, “Doktor Strenj”dagi Qariya bo‘ladimi yoki “Faqat sevishganlar omon qoladi” filmidagi zamonaviy vampir bo‘ladimi, har qanday obrazga osonlik bilan moslashib keta oladi.
Vupi Goldberg
Hatto yoshligida ham uni go‘zal deb bo‘lmasdi — Goldbergda na aniq yonoqlar, na chiroyli burun, na ideal yuz bor edi. Uning hatto qoshlari ham yo‘q: aytishlaricha, u qoshlarini tasodifan qirqib qo‘ygan ekan, lekin o‘sayotgan tuklar unga noqulay bo‘lavergach, u qoshlarini butunlay qirib tashlashga qaror qilgan.
Ammo aktrisaning hisobida 150 dan ortiq rol mavjud, u butun dunyo bo‘ylab shuhrat qozongan va millionlab muxlislarga ega. Qoshining yo‘qligi esa uning bir vaqtning o‘zida Amerikaning to‘rtta eng nufuzli kino mukofoti: “Emmi”, “Oskar”, “Gremmi” va “Toni” mukofotiga sazovor bo‘lishiga to‘sqinlik qilmadi.
Barbra Streyzand
Hatto o‘z onasi ham kichkina Barbrani “qo‘rqinchli” deb hisoblardi, maktabda esa tengdoshlari qizning burni juda uzun va kichkina, chuqur joylashgan ko‘zlari uchun doimo masxara qilishardi. Ammo bu bo‘lajak aktrisani tushkunlikka tushirmadi — aksincha, u klassik go‘zallik zerikarli deb hisoblardi. Yuzlari yoqimtoy qizlar juda ko‘p, Barbra esa boshqalarga o‘xshashni istamasdi. Aynan shu fikr unga nafaqat aktyorlik sohasida, balki qo‘shiqchi, bastakor va rejissyor sifatida ham olamshumul shuhrat qozonishiga yordam berdi.
Izoh (0)