Бу машҳурларнинг барчасига шон-шуҳрат чўққиларига чиқиш ташқи кўриниши жиҳатдан устунроқ бўлган ҳамкасбларига қараганда анча қийин кечган. Лекин улар чиройли чеҳра актриса учун энг муҳим нарса эмаслигини исботлай олишди.
Мерил Стрип
Ҳозирда киноюлдузлардан бири сифатида тан олинган Мерил Стрип фильмографиясида машҳур фильмлардаги ўнлаб роллар мавжуд. Бундан ташқари, у уч маротаба “Оскар” мукофоти соҳибаси, ушбу мукофотга йигирма мартадан ортиқ номзод бўлган, бу эса жаҳон рекорди ҳисобланади.
Аммо актёрлик фаолиятининг бошида уни истеъдодсиз ва хунук деб аташган. Фаолиятининг дастлабки даврларида Мерил Стрип “Кинг Конг” фильмидаги кастингга келган, лекин уни ҳатто синовга ҳам қўйишмаган ва продюсер уни “бурни қийшиқ бия” деб ҳақорат қилган. Актриса бунга муносиб жавоб қайтариб, шундай деган: “Сизни хафа қилган бўлсам, узр. Аммо мен қандай бўлсам, шундайман.”
Уйга қайтгач, у кечаси билан йиғлаб чиққан. Тинчлангач, ўзига бир умр ташқи қиёфасини бировнинг дидига мослаштирмасликка ваъда берган.
Сара Жессика Паркер
Унинг ташқи кўриниши ҳақиқатан ҳам ўзига хос: юзи чўзинчоқ, бурни узун, кўзлари кичкина, тишлари йирик ва пастки жағи катта. Бироқ жозибаси ва истеъдоди мўл-кўл. У машҳур сериалидаги қаҳрамони орқали бир неча авлод томошабинларининг севимли актёрига айланганига ҳайрон қолмаса ҳам бўлади. Ушбу машҳур роли билан у гўзал бўлмаса-да, услуб ва нозиклик тимсоли бўлиш мумкинлигини яққол исботлади.
Тилда Суинтон
Актриса ўзининг ўзига хос ташқи кўринишига асосий эътиборни қаратиб, уни ноёб брендга айлантирди, чунки айнан шу хусусияти унга энг қизиқарли ва ғайриоддий ролларни олиш имконини беради. Катта истеъдоди туфайли у “Нарния солномалари”даги Оқ жодугар бўладими, “Доктор Стренж”даги Қария бўладими ёки “Фақат севишганлар омон қолади” фильмидаги замонавий вампир бўладими, ҳар қандай образга осонлик билан мослашиб кета олади.
Вупи Голдберг
Ҳатто ёшлигида ҳам уни гўзал деб бўлмасди — Голдбергда на аниқ ёноқлар, на чиройли бурун, на идеал юз бор эди. Унинг ҳатто қошлари ҳам йўқ: айтишларича, у қошларини тасодифан қирқиб қўйган экан, лекин ўсаётган туклар унга ноқулай бўлавергач, у қошларини бутунлай қириб ташлашга қарор қилган.
Аммо актрисанинг ҳисобида 150 дан ортиқ рол мавжуд, у бутун дунё бўйлаб шуҳрат қозонган ва миллионлаб мухлисларга эга. Қошининг йўқлиги эса унинг бир вақтнинг ўзида Американинг тўртта энг нуфузли кино мукофоти: “Эмми”, “Оскар”, “Гремми” ва “Тони” мукофотига сазовор бўлишига тўсқинлик қилмади.
Барбра Стрейзанд
Ҳатто ўз онаси ҳам кичкина Барбрани “қўрқинчли” деб ҳисобларди, мактабда эса тенгдошлари қизнинг бурни жуда узун ва кичкина, чуқур жойлашган кўзлари учун доимо масхара қилишарди. Аммо бу бўлажак актрисани тушкунликка туширмади — аксинча, у классик гўзаллик зерикарли деб ҳисобларди. Юзлари ёқимтой қизлар жуда кўп, Барбра эса бошқаларга ўхшашни истамасди. Айнан шу фикр унга нафақат актёрлик соҳасида, балки қўшиқчи, бастакор ва режиссёр сифатида ҳам оламшумул шуҳрат қозонишига ёрдам берди.
Изоҳ (0)