Gollivudda qon rishtalari muhim rol o‘ynashi haqiqat. Ota-ona yoki bobosining izidan borgan musiqachilar-u, aktyorlikni tanlagan shou-biznes vakillarining farzandlari ko‘p uchraydi. Ushbu maqolada Gollivudning taniqli oilasida tug‘ilib o‘sgan va ota kasb — kino sanoatini tanlagan mashhurlarni ko‘rib chiqamiz.
Dakota Jonson
Dakota Jonson aktyor Don Jonson va aktrisa Melani Griffitning qizidir. Aktrisa Alfred Hitchkokning “Qushlar” (1963), “Marni” (1964) trillerlari va “Gonkong Grafinyasi” filmlari bilan tanilgan Tippi Hedrenning nabirasidir.
Dakotaning onasi Melani Griffit o‘z davrining mashhur aktrisasi bo‘lib, Tippining yagona qizidir. Ularning avlodi Gollivuddagi ko‘plab yulduzlar singari muhojirlar oilasi bo‘lgan. Ular Amerikaga Shvetsiyadan kelgan, onasining ajdodlari esa norveg va nemis bo‘lgan.
Kris Payn
Yangilangan “Star Trek” (2009–2016) va “Yerosti va ajdaholar” (2023) filmlari yulduzi Kris Payn ham aktyorlar oilasidan chiqqan. Uning buvisi kino tarixida kuchli ovozi bilan “hayqiriq malikasi” sifatida mashhur bo‘lgan Enn Gvindir. U 1939-yilda 21 yoshida aktyorlik faoliyatini boshladi va yigirma yil davomida faol ishladi. 50-yillarning oxiriga kelib aktrisa 41 yoshida Gollivudni tark etdi. Krisning ota-onasi aktrisa Gvin Gilford va aktyor Robert Payndir.
Jorj Kluni
Aktyor Jorj Kluni White Christmas va Mambo Italiano nomli xit qo‘shiqlari bilan mashhur xonanda va aktrisa Rozmari Klunining jiyanidir. Uning eng mashhur kino loyihasi “Porloq Rojdestvo” (1954) musiqiy romantik komediyasi bo‘lgan. edi. Rozmari Kluni jami 18 ta film va teleseriallarda ishtirok etgan va AQSHda u asosan xonanda sifatida tanilgan. Jorjning otasi, telejurnalist Nik Kluni Rozmarining ukasidir.
Dryu Berrimor
“O‘zga sayyoralik”, “Va’da berish — uylanish degani emas”, “Charli farishtalari” filmlaridagi obrazlari bilan Gollivudda mashhur bo‘lgan aktrisa Dryu Blayt Berrimor 1875-yilga borib taqaladigan aktyorlar oilasidan. Bu sulolaga uning katta bobosi, muvaffaqiyatli teatr aktyori Moris Barrimor hamda uning qizi — Berrimorning buvisi Jorji Dryu asos solgan. Moris va Jorjining farzandlari Jon, Lionel va Etel Amerika kino afsonalariga aylandi.
Dryuning bobosi Jon Berrimor 18 yoshidan boshlab otasining spektakllarida chiqa boshlagan. U “Gamlet” (1922), “Sherlok Xolms” (1922) va “Grand mehmonxonasi” (1932) filmlarida suratga tushgan.
Una Chaplin
“Taxtlar o‘yini” (2011–2019) va “Tabu” (2017) seriallarining yulduzi Una Chaplin taniqli insonlar oilasida tug‘ilgan. Uning onasi taniqli aktrisa Jeraldin Chaplin, bobosi ovozsiz kino afsonasi Charlz Chaplindir. Katta bobosi esa amerikalik dramaturg Yujin O’Nildir.
Keyt Byorton
Amerikalik kino va teatr aktrisasi, teleboshlovchi Keyt Byorton teatr va kino afsonasi Richard Byortonning besh nafar farzandlaridan biri. Keytning onasi Richardning birinchi turmush o‘rtog‘i Sibil Uilyamsdir.
1979-yilda Keyt Braun universitetining Rus tili va Yevropa tarixi fakultetini tamomlagan. Talabalik paytida u teatr san’atiga qiziqib qoldi va Yel teatr maktabiga o‘qishga kirdi hamda magistrlik darajasini oldi. Aktrisa teatr, kino va televideniyedagi fidoyi faoliyati uchun bir necha nominatsiyalarda turli mukofotlarni qo‘lga kiritgan.
Izoh (0)