Nurafshon shahrida korxona 581,1 million so‘mlik elektr energiyasidan noqonuniy foydalanib kelgani aniqlangan. Bu haqda Iqtisodiy jinoyatlarga qarshi kurashish departamenti xabar bermoqda.
Ma’lum qilinishicha, o‘tkazilgan tergovga qadar tekshiruvda mas’uliyati cheklangan jamiyatga tegishli omborxona ko‘zdan kechirilgan. Korxonani norasmiy boshqarib kelgan shaxs va boshqalar o‘zaro til biriktirib, shlakoblok ishlab chiqarish uskunalari va suv nasoslarini tijorat maqsadida umumiy foydalanishdagi tarmoqqa to‘g‘ridan to‘g‘ri ulab olgani aniqlangan.
Dastlabki hisob-kitoblarga ko‘ra, korxona 581,1 million so‘mlik elektr energiyasidan noqonuniy foydalangan.
Hozirda mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘ona, Samarqand va Sirdaryoda qariyb 340 mln so‘mlik, Namanganda qariyb 192 mln so‘mlik, mayning ferma 5,5 mlrd so‘mlik elektr energiyasidan noqonuniy foydalangani aniqlangan edi.
Izoh (0)