Raqobat qo‘mitasiga respublika bo‘ylab iste’molchilar tomonidan kommunal sohasi – elektr ta’minotiga oid tushgan murojaatlarning aksariyatida elektr energiyasi iste’molini hisobga olish uskunalarini xarid qilish, o‘rnatish, ro‘yxatdan o‘tkazish, davriy davlat qiyoslovi va plombalash jarayonlari, shuningdek, asossiz qarzdorliklarni yuzaga kelayotgani yuzasidan e’tirozlar bildirilgan. Bu haqda qo‘mita axborot xizmati xabar bermoqda.
Toshkent shaharida D.U. ismli shaxs xonadonida elektr ta’minoti kuchlanishi oshib ketganligi sababli ushbu hududdagi xonadonlarda barcha maishiy texnikalar ishdan chiqqanligi va yong‘in sodir bo‘lganligi natijasida yetkazilgan 2 million 350 ming so‘m zararni undirib berilgan.
Qoraqalpog‘istonda yana bir shunday holatda elektr energiya kuchlanishi natijasida muzlatkich, televizor va tikuv mashinalari ishdan chiqqanligi ma’lum bo‘lgan. Ta’minotchi korxonaga nisbatan tegishli tartibda ish qo‘zg‘atilgan va elektr energiya kuchlanishi natijasida ishdan chiqqan jihozlarning ta’mirlashga sarflangan mablag‘larini qoplab berish to‘g‘risida bajarilishi lozim bo‘lgan ko‘rsatma berilgan.
Namangan viloyatida fuqaroga elektr ta’minoti korxonasi asossiz hisoblagan 4 million 750 ming so‘m qarzdorlik bekor qilingan. Toshkent, Surxondaryo, Qashqadaryo, Navoiy, Sirdaryo hamda Farg‘ona viloyatida fuqarolarga ortiqcha va asossiz hisoblangan mablag‘lar olib tashlangan.
Andijon viloyatida esa “Navoiy” mahallasida simyog‘ochlar eskirganligi, buning oqibatida elektr simlari muntazam uzilib qolayotganligi va bu holatlar inson hayotiga xavf tug‘dirish darajasida ekanligi ma’lum bo‘lgan. O‘rganish natijasida mahallaga 8 ta yangi, zamonaviy simyog‘ochlar o‘rnatib berilgan.
Izoh (0)