Namangan viloyati sudi raisi o‘rinbosari – fuqarolik ishlari bo‘yicha sudlov hayʼati raisi A.S. Namangan shahri, Alisher Navoiy ko‘chasi 49-uydagi o‘zganing egaligidagi xonadonni soxta hujjatlar bilan o‘z nomiga rasmiylashtirib, boshqa bir odamga sotib yuborgani maʼlum bo‘lmoqda.
Kun.uz muxbiri uyning haqiqiy egasi bilan gaplashdi. Uning bildirishicha, kvartirada doimiy hech kim yashamagan. “Bu ehtiyojimizdan ortiqcha bo‘lgan uy edi. Doimiy yashamasak-da, yo‘limiz tushganida bir kun-yarim kun turib ketardik. Usta tushirib, taʼmirlayotgandik, boshqa odam “dokument” ko‘tarib keldi. Shunda bilib qoldik. Ushbu ishga aralashgan insonlarning hammasi javobgarlikka tortilyapti”, deydi uy egasi.
Sudyalar Oliy kengashi matbuot kotibi Tursunali Akbarov A. S. ga nisbatan xizmat tekshiruvi o‘tkazilganini bildirib, tekshiruv xulosasi tegishli qaror qabul qilish uchun Sudyalar oliy malaka hayʼatiga yuborilganini maʼlum qilgan.
Xizmat tekshiruvi natijalari Sudyalar oliy malaka hayʼatiga qaror qabul qilish uchun yuborilganining o‘zi shikoyat vajlari tasdiqlanganini mantiqan anglatadi. Daryoning shu mazmundagi savoliga Kengash matbuot kotibi “bu haqda gapirishga hali erta” degan umumiy javob bilan cheklandi.
Bu — Namangan viloyati sudi bilan bog‘liq birinchi shov-shuvli holat emas. Avvalroq katta miqdorda elektr energiyasi o‘g‘irlagan Pop tumani hokimining o‘g‘li qamoqdan ozod qilingani, xuddi shunday jinoyatga qo‘l urgan boshqa tadbirkor esa qamoqda qolgani maʼlum bo‘lgan edi. Shunga qaramay viloyat sudi raisi hamda sudyalari taqdirlangan edi.
Izoh (0)