O‘zbekistonda atom elektr stansiyasi qurilishiga bir nechta banklar sarmoya kiritmoqchi. Bu haqda “O‘zatom” agentligi huzuridagi AES qurilishi direksiyasi direktori Otabek Omonov maʼlum qildi.
Joriy yil O‘zbekistonda ilk bor atom elektr stansiyasi (AES) qurish ishlariga kirishildi. Umumiy quvvati 330 megavvatli stansiya Jizzax viloyati Forish tumanida Rossiyaning “Rosatom” tuzilmasidagi “Atomstroyeksport” AJ tomonidan quriladi.
Bugun, 15-oktyabr kuni Toshkent shahrida o‘tkazilgan ilmiy anjumanda mazkur loyiha va O‘zbekistonda atom energetikasini rivojlantirish masalasi muhokama qilindi. Bu haqda “Daryo” muxbiri xabar berdi.
Tadbirda o‘nga yaqin davlatlardan kelgan xalqaro ekspertlar ishtirok etdi. Muloqot davomida AES qurishning global tendensiyalari, ijtimoiy–iqtisodiy hamda ekologik xavfsizlik masalalari muhokama qilindi.
“O‘zatom” agentligi huzuridagi AES qurilishi direksiyasi direktori Otabek Omonov loyiha bo‘yicha joriy yil yakuniga qadar va 2025-yil davomida qanday ishlar bajarilishini aytib o‘tdi.
“Hozir AES maydonida rejim-kuzatuv ishlari olib borilyapti. Maydon yanada chuqur o‘rganilmoqda. Quruvchilar uchun kichkina shahar qurish ishlari boshlandi. AES qurilishining eng qizg‘in davrida maydonda 10 ming nafargacha quruvchi ishlaydi. Biz ularga sharoit yaratib berishimiz kerak. Rossiya delegatsiyasi kelgan. Ular bilan kichik AES qurishning texnik shartini ko‘rib chiqyapmiz. Qurilish-montaj bazasini texnik shartlari ham ko‘rib chiqilmoqda. Shu bilan birga, TEO, yaʼni texnik iqtisodiy asoslarni ham ishlab chiqyapmiz. Maqsadimiz joriy yil oxirigacha texnik-iqtisodiy asos, ekologiya va birlamchi xavfsizlik hisobotini boshlash. 2025-yil yakunigacha maydonchaga AES joylashuvi bo‘yicha ruxsatnoma olmoqchimiz. Muhim asbob-uskunalarni ham o‘z vaqtida joylashtirsak, 2029-yil yakunida stansiyaning birinchi qismi ishga tushirilishi mumkin”, dedi mutaxassis.
Otabek Omonovning taʼkidlashicha, AES qurilishi investitsiya mablag‘lari hisobidan amalga oshiriladi. Hozirgacha bir necha banklar sarmoya kiritish taklifini bildirgan.
“Hozirda bir necha Yevropa, Rossiya va mahalliy banklar bilan AESga sarmoya kiritish bo‘yicha muzokara olib borilyapti. Kerakli takliflar rahbariyatga taqdim etilgan. Qaysi banklar bizga maʼqul taklif bersa, ular bilan hamkorlik qilinadi. Chet el banklari krediti ham investitsiyaga tenglashtiriladi”, dedi direksiya rahbari.
Avvalroq AESning birinchi bloki 5 yil ichida ishga tushirilishi maʼlum qilingandi. Loyiha to‘liq ishga tushirilishi uchun esa 7-8 yil vaqt talab etiladi. Stansiyaning umumiy maydoni 50 gektarga yaqin bo‘lib, u to‘liq ishga tushsa, yiliga 3 milliard kilovatt/soatgacha elektr energiyasi ishlab chiqarishi kutilmoqda.
Izoh (0)