Saudiya Arabistonining ACWA Power kompaniyasi O‘zbekistonda yashil energetika loyihalariga qariyb 15 milliard dollar sarmoya kiritmoqda. Bu haqda “Daryo” muxbiri bilan suhbatda kompaniyaning qurilish sohasida Markaziy Osiyo bo‘yicha vitse–prezidenti Entoni Brinkuizen maʼlum qildi.
Toshkent shahrida 17–25-oktyabr kunlari “Xalqaro hamkorlik tashabbuslari haftaligi” bo‘lib o‘tdi. Muloqotlardan biri O‘zbekistonda ‘yashilʼ energetikaga o‘tish istiqbollariga bag‘ishlandi. Tadbir yakunida Entoni Brinkuizen “Daryo” muxbiri bilan suhbatlashdi. ACWA Power vakilining aytishicha, kompaniya O‘zbekistonda shamol va quyoshdan elektr energiyasi olish borasida yirik loyihalarni amalga oshirmoqda.
“O‘zbekistonda ‘yashilʼ energetika loyihalariga jami 15 milliard dollar sarmoya kiritmoqdamiz. Bu mablag‘ 15 ta loyihaga ajratilyapti. Loyihalarning asosiy qismi shamol energetikasiga to‘g‘ri keladi. Xususan, sarmoyalarning 87 foizi ‘yashilʼ energetika loyihalariga, qolgan qismi ‘yashil vodorodʼ ishlab chiqarishga yo‘naltiriladi. Bizning kompaniya tomonidan kiritilayotgan sarmoyalarning eng katta miqdori Saudiya Arabistonidan keyin O‘zbekistonga to‘g‘ri keladi”, — dedi mutaxassis.
Entoni Brinkuizenning taʼkidlashicha, ayni paytda 15 ta loyihadan ikkitasi ishga tushgan va ulardan elektr energiyasi olinmoqda. Yana 6 ta loyihada qurilish ishlari ketayotgan bo‘lib, ular 2025-yildan ishga tushiriladi.
“2030-yilgacha 15 ta loyihaning barchasini ishga turishish rejalashtirilgan”,—deydi kompaniya vakili.
Maʼlumot uchun, 2023-yil 27-noyabrda “ACWA Power” bilan amalga oshirilayotgan loyihalar — Sirdaryo viloyatida 1500 megavatt quvvatli zamonaviy bug‘-gaz elektr stansiyasini tarmoqqa ulash hamda Toshkent viloyatida “yashil vodorod”ni “pilot” tarzda ishlab chiqarish quvvatlarini barpo etish boshlangan.
Sirdaryodagi qiymati 1,1 milliard dollarlik IES loyihasi 3 milliondan ziyod xonadon va yuzlab sanoat korxonalarini elektr energiyasi bilan taʼminlash imkonini berishi qayd etilgan. Shu bilan birga, “yashil vodorod” loyihasining birinchi bosqichida 3 ming tonna vodorod ishlab chiqarilishi aytilgan. Keyinchalik mineral o‘g‘itlar qayta ishlanishi, 52 megavattlik shamol elektr stansiyasi qurilishi taʼkidlangan.
Izoh (0)