Energetika vaziri Jo‘rabek Mirzamahmudov “Lolazor” podkastida qish mavsumi uchun O‘zbekistondagi gaz omborlariga 5,1 milliard kub metrdan ortiq gaz zaxirasi jamlanganini ma’lum qildi.
Vazirning bildirishicha, bugungi kunda energetika sohasiga faqat kuz-qish emas, yoz mavsumi ham kirdi. Sababi yozda harorat oshishi bilan elektr energiyasi iste’moli ortmoqda. Faqat O‘zbekistonda emas, boshqa davlatlarda ham, hatto energiya tizimi barqaror bo‘lgan Rossiyaning bir necha hududlarida ham yozda cheklovlar joriy etildi.
Jo‘rabek Mirzamahmudovning ta’kidlashicha, energetiklar tayyorgarligi doim bo‘lgan, lekin bu yilgi kuz-qish mavsumiga tayyorgarlik barvaqt boshlandi.
“Fevral oyidayoq prezidentimiz topshiriq berganlar. Tizimlarni tayyorlash, mavjud kamchiliklardan kelib chiqqan holda, saboqlarni inobatga olgan holatda barcha tizim — qazib chiqarish bo‘ladimi, yetkazib berish, taqsimlash va eng asosiysi generatsiya masalalariga katta e’tibor berildi”, dedi vazir.
Jo‘rabek Mirzamahmudoving ta’kidlashicha, qo‘shimcha quvvatlarni ishga tushirish ham muhim bo‘ldi, chunki oldingi yillarda eng katta muammo generatsiyada edi. Iste’mol oshib borgan, yangi quvvatlar albatta qo‘shilgan, lekin yetarli darajada bo‘lmagan.
Bu yilda esa eng asosiysi juda katta hajmda qayta tiklanuvchi energiya manbalaridan foydalanib, generatsiya quvvatlarini oshirishga erishildi. Eng asosiysi, tayyorgarlik yuqori darajada bo‘ldi. Barcha turdagi zaxiralar, yoqilg‘i zaxiralari tayyorlandi. Birinchi o‘rinda tabiiy gazni yer ostiga yig‘ish jarayoni boshlandi.
“Bizda hozir qish mavsumi uchun yerosti gazni saqlash omborlariga 5,1 milliard kub metrdan ortiq gaz zaxirasi yig‘ildi. Agar solishtiradigan bo‘lsak, bu o‘tgan yilgi hajmga nisbatan 1,1 mlrd kub metr ko‘proq”, dedi energetika vaziri.
Energetika vaziri 2023-yilda “Daryo”ga bergan intervyusida nima uchun mamlakatda talab bo‘la turib, tabiiy gaz chet elga eksport qilinishi haqida izoh bergandi. Unda tabiiy gaz import qilish siyosat bilan bog‘liq emasligini taʼkidlab o‘tgandi.
Jo‘rabek Mirzamahmudov 2024-yil may oyida bergan intervyusida O‘zbekistondagi 85 foiz konlardan tabiiy gaz qazib olib bo‘linganini aytgan edi.
Izoh (0)