“Million” jamoasi sardori Davron Kabulov “Daryo”ga bergan intervyusida Yakkasaroy tuman prokuraturasi, departamenti va tumangaz filiali mas’ullari haqida gapirib, “davlat jilovining bir ipi qo‘limda deb xohlagan ishni qilish kerak emas”, degandi. Bosh prokuratura uning chiqishiga munosabat bildirdi. Bir necha kundan keyin Davron Kabulov Instagram tarmog‘iga bu bo‘yicha video joyladi.
— “Daryo” ga bergan intervyumdan keyin Bosh prokuratura bundan olti oy avval eʼlon qilingan sud qarorining tafsilotlarini ommaga oshkor etdi. Bu tafsiyalotlarda yolg‘on maʼlumotlar keltirilgan. Otam ham, men ham o‘g‘ri emasmiz. Elektr energiyasi, suv yoki boshqa to‘lovlar bilan ham muammomiz bo‘lmagan. Buni atrofimizdagi insonlar juda yaxshi bilishadi.
Bosh prokuraturaning bayonotidan keyin ijtimoiy tarmoqlarda menga va otamga nisbatan juda ko‘p adolatsiz ayblovlar yog‘dirildi. “Gaz o‘g‘risining bolasi”, “To‘g‘ri yashash haqida aql o‘rgatgandan ko‘ra gazning pulini to‘lab yursang, bo‘lmaydimi?” deganlar bo‘ldi. Tabiiyki, men va otamning shaʼni turgan yerda jim turolmadim.
Shu yurtning suvini ichaman, nonini yeyman. Meni boqayotgan yurtning gazini ishlatib, uni to‘lamaslikni o‘zimni ep ko‘rmayman. Bayonotda 2022-yil fevral oyidan boshlab gazdan noqonuniy foydalanib kelingan deyilgan. Aslida esa biz shu yilning ayni fevral oyida gazga ulanish uchun ruxsat olganmiz. Ruxsatnomadan keyin qurilish montaj ishlarini boshlash va hisoblagich o‘tkazishgacha bo‘lgan jarayonlarni amalga oshirganmiz. Hisoblagich o‘rnatishgacha bo‘lgan jarayon uzoq vaqt talab qilishi va byurokratik jarayon ekanligini umrida bir marta bo‘lsa ham gaz o‘rnatib ko‘rgan odamlar yaxshi bilishadi.
Mehmonxonamiz 6 sotixli maydonda qurilgan, hatto oshxonasiga ham elektr pechlari o‘rnatilgan. Bu yer oilaviy korxona bo‘lgani va turar joy sifatida shakllantirilgani uchun podval qismiga gaz moslamalarini o‘rnatishga ruxsat berilmaydi. Mehmonxona 2023-yilning 1-avgustidan o‘z faoliyatini boshladi. Ikki yarim oydan so‘ng Yakkasaroy tuman iqtisodiy jinoyatlarga qarshi kurashish departamenti va “Raygaz” hamkorlikdan reyd uyushtirishdi. Reydda “Raygaz”ning vakili Saidakbar Rixsiyev departament xodimlari bilan birga keldi. U avval ham kelgan ammo bir varaq qog‘ozga gazdan foydalanishda qanday xatoliklarga yo‘l qo‘yilayotgani haqida yozib o‘tmagan. Hisoblagichni yoqish va o‘chirishni otam ikkimiz bilmaymiz, unga gaz xodimlaridan boshqa hech kim tegmagan. Endi faoliyatini boshlayotgan tadbirkorlik subyektini kamchiligi bo‘lsa avval ogohlantirish kerak emasmi? Bu yerda bizda ayb yo‘q, deb o‘zimni oqlamoqchi emasman. Tartibini to‘liq bilmaganimiz uchun 98 foiz hujjatlarni to‘g‘rilab, oxiriga kelganda biroz kamchilikka yo‘l qo‘yganmiz. Lekin buning ortida gazni pulini to‘lamaslik yoki sezib qolishgunigacha noqonuniy foydalanish maqsadi bo‘lmagan.
Sudda ham aytdim, “Ishlatgan gazimizga pul to‘lashga tayyorman, hatto qarzdorlik penyalarini ham to‘lashdan bosh tortmayman. Lekin iltimos yemagan somsamizga 100 barobar ortig‘i bilan to‘latmanglar”, dedim. Chunki 6 yilda qurilgan va ikki oygina ishlagan mehmonxona hali yaqin besh yilsiz foydaga kirishi dargumon. Qizig‘i, endi faoliyatini boshlagan tadbirkorlik subyektiga shuncha qarzni bo‘yniga ilib qo‘yishdi. Bayonotni tahlil qiladigan bo‘lsak, olti sotixli joyda 344 million so‘mli gazni qanday yoqishi mumkin? Men metan gaz quyish shoxobchasini ochganim yo‘q-ku. Biz to‘lagan shu pulning kamida 300 million so‘midan biz foydalanmaganmiz, deydi Davron Kabulov.
Izoh (0)