O‘zbekistonda 2024-yil boshidan buyon quyosh va shamol elektr stansiyalari tomonidan 4 mlrd kVt/soatdan ortiq elektr energiyasi ishlab chiqarildi. Bu haqda Energetika vazirligi matbuot xizmati xabar berdi.
Qayd etilishicha, bugungi kunda O‘zbekistonning 7 ta viloyatida umumiy quvvati 2,7GVt bo‘lgan 9 ta quyosh fotoelektr stansiyasi hamda bitta shamol elektr stansiyasi “yashil” energiya ishlab chiqarmoqda.
Ushbu “yashil” elektr stansiyalar tomonidan 2024-yil 31-may soat 15:00 ga qadar 1 mlrd kVt/soat miqdorida, 2024-yilning birinchi yarim yilligida 1,6 mlrd kVt/soat miqdorida, 2024-yil 17-iyul soat 18:20 holatiga 2 mlrd kVt/soat va 2024-yil 30-avgust holatiga ko‘ra esa 3 mlrd kVt/soat miqdorida elektr energiyasi ishlab chiqarilgan.
20-oktyabr soat 12:00 da mamlakatdagi barcha quyosh va shamol elektr stansiyalari tomonidan ishlab chiqarilgan elektr energiyasi miqdori 2024-yil boshidan 4 mlrd kVt/soatni tashkil qildi.
Ta’kidlanishicha, shu paytgacha quyosh elektr stansiyalari tomonidan 3 mlrd 493,6 mln kVt/soat, shamol elektr stansiyasi tomonidan esa 506,4 mln kVt/soat elektr energiyasi ishlab chiqarildi.
Buning natijasida:
- 1,2 mlrd kub metr tabiiy gaz tejalishiga erishildi;
- atmosferaga 1 mln 680 ming tonna zararli gazlar chiqishining oldi olindi.
Mazkur hajmdagi elektr energiyasi 2 million xonadonning 10 oylik yoki 1 mln 666 mingta xonadonning bir yillik ijtimoiy normasini tashkil qiladi.
Navoiy va Samarqand viloyatlaridagi quyosh fotoelektr stansiyalari 2022-yilda 434 mln kVt/soat, 2023-yilda esa 576,9 mln kVt/soat elektr energiyasi ishlab chiqargan edi.
Aholi va iqtisodiyot tarmoqlari talabidan kelib chiqib, kelgusi uch yilda 8 gigavattli 28 ta yirik quyosh va shamol elektr stansiyalarini ishga tushirish, 944 kilometr yuqori kuchlanishli elektr tarmoqlari va 6 ta yirik podstansiyani qurish, jami 2,2 gigavatt bo‘lgan 18 ta elektr saqlash quvvatlarini o‘rnatish rejalashtirilgan.
Izoh (0)