Isroil rasmiylari Eronga hujum qilishga tayyorgarlik haqidagi hujjatlar Amerika OAVlariga sizib chiqqanidan keyin uni kechiktirishga qaror qildi. Bu haqda The Times xabar berdi.
Unga ko‘ra, Isroil rasmiylari muqobil reja ustida ishlamoqda.
Nashrning aniqlik kiritishicha, Isroil bu ma’lumotlarning tarqalishi Eronga ma’lum hujum shakllarini bashorat qilishga yordam berishi mumkinligidan xavotirda.
“AQSH hujjatlarining oshkor etilishi ma’lum strategiya va tarkibiy qismlarni o‘zgartirish zarurati tufayli hujumni kechiktirdi. Qasos olinadi, ammo bu kutilganidan ko‘proq vaqt talab qildi”, deydi nashrning razvedkadagi manbasi.
Eron 1-okyabr kuni Isroil hududiga 180 dan ortiq ballistik raketa uchirgan edi va buni Livan “Hizbulloh”i bosh kotibi Hasan Nasrullohning o‘ldirilishiga javob deb atagan. Isroil ommaviy ravishda hujumga javob berishga va’da bergan.
18-oktyabr kuni internetda 15 va 16-oktyabr kunlari Isroil qo‘shinlarining harakati va yahudiy davlatining Eronga hujumga tayyorgarligi haqidagi “o‘ta maxfiy” deb belgilangan hujjatlar paydo bo‘ldi. Nashr qilingan fayllarga ko‘ra, Isroil Eronga hujum qilish uchun havo-yer raketalaridan foydalanishni mashq qilmoqda.
Bundan tashqari, garchi mamlakat rasmiylari rad etsa-da, hujjatlar Isroilning yadro quroliga ega ekanligini bilvosita tasdiqlagan. Qayd etilishicha, AQSH ma’lumotlar sizib chiqishini tekshirmoqda.
Izoh (0)