Livandagi “Hizbulloh” harakati Isroil bosh vaziri Binyamin Netanyaxuning qarorgohiga qilingan hujum ortidan yana ikki isroillik siyosatchiga suiqasd uyushtirishga urindi. Bu haqda Al Arabiya telekanali manbalarga tayanib xabar berdi.
Ammo gap qaysi siyosatchilar haqida ketayotgani aniq aytilmagan. Manbalarga ko‘ra, suiqasd tayyorlanayotganidan xabar topgan Isroil tomoni “Hizbulloh”ga tahdid qilgan: agar hujumlar sodir etilsa, Bayrutning janubiy chekkasi va ushbu tashkilotning Livan poytaxtidagi asosiy tayanchi bo‘lgan Dahiya tumani butunlay yo‘q qilinadi. Telekanal suhbatdoshlariga ko‘ra, “Hizbulloh” bu tahdiddan so‘ng hozircha hech qanday qaror qabul qilmagan.
Avvalroq Netanyaxu “Eron agentlari”ni 19-oktyabr kuni Kesariya shahri yaqinidagi qarorgohida dron hujumi uyushtirganlikda ayblagan va bu Isroilni “Hizbulloh” hamda HAMASga qarshi harbiy amaliyotlarni davom ettirishdan voz kechishga majbur qilmasligini aytgan edi.
“Dron hujumi paytida Netanyaxu va uning rafiqasi Sara qarorgohda bo‘lmagan. Hech kim jarohat olmagan”, deya xabar berdi The Times of Israel.
Izoh (0)