Исроил расмийлари Эронга ҳужум қилишга тайёргарлик ҳақидаги ҳужжатлар Америка ОАВларига сизиб чиққанидан кейин уни кечиктиришга қарор қилди. Бу ҳақда Тhe Times хабар берди.
Унга кўра, Исроил расмийлари муқобил режа устида ишламоқда.
Нашрнинг аниқлик киритишича, Исроил бу маълумотларнинг тарқалиши Эронга маълум ҳужум шаклларини башорат қилишга ёрдам бериши мумкинлигидан хавотирда.
“АҚШ ҳужжатларининг ошкор этилиши маълум стратегия ва таркибий қисмларни ўзгартириш зарурати туфайли ҳужумни кечиктирди. Қасос олинади, аммо бу кутилганидан кўпроқ вақт талаб қилди”, дейди нашрнинг разведкадаги манбаси.
Эрон 1-окябр куни Исроил ҳудудига 180 дан ортиқ баллистик ракета учирган эди ва буни Ливан “Ҳизбуллоҳ”и бош котиби Ҳасан Насруллоҳнинг ўлдирилишига жавоб деб атаган. Исроил оммавий равишда ҳужумга жавоб беришга ваъда берган.
18 октябрь куни интернетда 15 ва 16 октябрь кунлари Исроил қўшинларининг ҳаракати ва яҳудий давлатининг Эронга ҳужумга тайёргарлиги ҳақидаги “ўта махфий” деб белгиланган ҳужжатлар пайдо бўлди. Нашр қилинган файлларга кўра, Исроил Эронга ҳужум қилиш учун ҳаво-ер ракеталаридан фойдаланишни машқ қилмоқда.
Бундан ташқари, гарчи мамлакат расмийлари рад этса-да, ҳужжатлар Исроилнинг ядро қуролига эга эканлигини билвосита тасдиқлаган. Қайд этилишича, АҚШ маълумотлар сизиб чиқишини текширмоқда.
Изоҳ (0)