Taniqli promouter Tom Leffler o‘z mijozi, ukrainalik Sergey Bogachukning sobiq jahon chempioni Isroil Madrimovga qarshi bo‘lajak jangi haqida gapirdi.
“Madrimov Bogachuk uchun yana bir qiyin raqib, ammo, o‘ylaymanki, bu Sergey uchun g‘alabali jang bo‘ladi. Bu uning uchun yana bir katta imkoniyat. Agar u Madrimovni mag‘lub eta olsa, bu uning Brayan Mendosa va Virjil Ortisga qarshi janglar bilan birgalikda ajoyib yil o‘tkazganini anglatadi.
Yodingizda bo‘lsin, o‘sha paytda Virjil Ortis 20 ta nokaut bilan 20:0 hisobida rekord o‘rnatgan va odamlar uni Bogachukni nokautga uchratishini kutishgandi. Ammo Bogachuk uni ikki marta nokdaunga tushirganida, bu odamlarning ko‘zini ochgandi.
Hozir ko‘pchilik Bogachukni bu jangda autsayder sifatida ko‘rmoqda, lekin men uning g‘alaba qozonishiga ishonchim komil. Bu fikrlarni Sergey bilan ishlaganim uchun bildirmayapman. Uning imkoniyatlarini yaqindan bilganim uchun aytyapman”, — deydi Leffler.
Eslatib o‘tamiz, Isroil Madrimov va Sergey Bogachuk o‘rtasidagi jang 21-dekabr kuni Saudiya Arabistoni poytaxti Ar-Riyod shahrida Oleksandr Usik—Tayson Fyuri revansh jangining anderkardida bo‘lib o‘tadi.
Madrimov o‘zining so‘nggi jangini Terens Kroufordga qarshi 4-avgust kuni Los-Anjelesda o‘tkazgandi. Jang amerikalik bokschining ochkolar hisobiga (115-113, 115-113, 116-112) ko‘ra g‘alabasi bilan yakunlangan edi.
Ukrainalik 29 yoshli Sergey Bogachuk (24-2-0) esa o‘zining oxirgi jangini Verjil Ortisga qarshi o‘tkazib, imkoniyatni boy bergan.
Izoh (0)