Isroil hukumati Eronning 1-oktyabr kungi raketa hujumiga javob choralari ko‘rish rejasini ishlab chiqishni yakunladi, deya tegishli manbalarga tayanib CNN xabar berdi.
“Eronning 1-oktyabrdagi hujumiga Isroilning javob berish rejasi tayyor” deyiladi xabarda.
Manba reja tafsilotlarini oshkor qilmagan.
Eron tashqi ishlar vaziri Abbos Araqchi chorshanba kuni BMT bosh kotibi Antoniu Guterrishga Tehron Isroilning dushmanona harakatlariga qatʼiy javob berishini ma’lum qilgan.
“Eron mintaqada tinchlik va xavfsizlikni himoya qilish uchun barcha sa’y-harakatlarini amalga oshirib, hujum sodir etganlarni pushaymon qiladigan muhim javobga to‘liq tayyor”, deydi Araqchi idorasi.
1-oktyabr kuni Islom inqilobi qo‘riqchilari korpusi Isroilga ko‘p sonli raketalarni uchirgan edi. Isroil harbiylari hujumga o‘rinli bo‘lgan vaqtda javob berishini ta’kidlagan.
- G‘arb matbuoti Isroil o‘ch olish maqsadida Eronning neft va yadroviy inshootlariga zarba berishi mumkinligi haqida xabar bergan edi.
- Washington Post manbalariga tayanib, Isroil neft yoki yadroviy obyektlarga emas, Eronning harbiy obyektlariga zarba berishga tayyorligini xabar qilgan.
- Kan telekanali Milliy xavfsizlik bo‘yicha maslahatlashuvlar chog‘ida Isroil bosh vaziri Benyamin Netanyaxu va mudofaa vaziri Yoav Galant Eronga qarshi ehtimoliy javob hujumi rejasi hamda vaqti bo‘yicha kelishib olgani haqida xabar bergan edi.
- Operatsiyani boshlash uchun esa Vazirlar Mahkamasining yakuniy roziligi talab qilinishi aytilgan.
Izoh (0)